Chhiatna thlen chhan…

Chhum lo chat lova ni engemawzat ruah a sur avangin Mizoram hmun hrang hrangah chhiatna nasa tak a thleng a, nunna hlu tak tak kan chân a, in leh lo, lirthei, huan thlai tam tak kan chân a, leimin avangin inkalpawhna kawng a ping a, kawlphetha a mumal thei lova, zirna in khar a ngai a, eizawnna a buai a, Mizoramin ‘chhiat kan tawk’ a ni ber a; a pawi hle a ni.
Chhiat tawh mek laia ngaihtuahna luahtu pakhat, sawi chhuah nuam hran lem lo, mahse sawi chhuah tul tlat si hi a awm ve thin a, chu chu ‘natural disaster’ (khuarel chhiatna) tih leh ‘man-made disaster’ (mihringte siam chawp chhiatna) chungchang hi a ni.
Entirnan, Aizawl bik hi han thlurbing ila: Khawpui chhung hmun hrang hranga chhiatna thleng hi ruah a sur vanga lo thleng chu a ni teh meuh mai. Ruahsur nasa tak chuan leilung a lo tidanglam thei a, lei a min phah a, chu leimin chu ruahsurin a thlentir a nih avangin ‘natural disaster’ tia puh a remchang hle thin a ni.
Hetih rual hian, ruah a sur avanga lei a lo min a, chenna in te a tawlh duai duai theih fo chhan hi, a tam zawk chu tuiluankawr kan siam mumal loh vang te, leilung nghet lo tih hre reng chunga building rit pui pui kan sak vang te a ni thin a. Lei a khi, lei a tawlh kan tihte pawh hi, a hma kum engemawti kalta atanga a derthawn dan hriat tawh, mahse ngaihthah zui avanga a hnua chhiatna lo thleng ta te a ni thin bawk. Thil dang pawh sawi tur a tam hle awm e.
Tunhmaa fur ruahtui tam lai pawha thleng zen zen lo, mahse tun hnua fur apianga harsatna lian tak lo thleng thin chu, tui a nut nasat avanga tui thlitfim theih loh, tui pump theih loh, tih hi a ni.
Tunhma kum tam tak chhung khan, ruah a surin lui tui te chu a nu phet phut thin; mahse, tui thlitfim theih loh khawpa nu nasa a ni ngai meuh lo a, chutiang chu a lo awm a nih pawhin a nasa lova, a rei bawk hek lo. Tun hnuah hi chuan, ruah a tlak hlek tawh chuan tui a nu, tui a pump theih loh, tih a ni ta zel mai a. Hei pawh hi hmasawnna hnathawh (kawngpui laih, construction etc) vang a ni a, a nih dan tur anga hna thawh a nih loh vangin kan lui tuiin a tuar a, mipui nunna hnar ber ‘Tui’ tlakchhamna a lo thlen phah a, chu chu ruahin a thlentir ni lovin mihringin kan thlentir a ni.
Chutiang zelin, han chhui han chhui ila, chhiatna thleng thin tam zawk hi chu keimahni mihringten kan insiam chawp hi a lo ni deuh zel. Chuti a nih chuan, chhiatna tireh theitu pawh mihringte tho kan nih chu.