Chhinga Veng FC aiawhtu Ramhlun Athletic FC

Chhinga Veng FC chuan Mizoram football league top flight Mizoram Premier League (MPL) an luah mek dinhmun chu Ramhlun Athletic FC hnenah an tiral tih thuchhuah siamin an tarlang a, an kal zelna turah Ramhlun Athletic hi duhsakna hlan chungin anni pawh engtik ni-ah emaw chuan top flight-a kirleh ngei an inbeisei thu an tarlang tel.
CVFC hi 2012-2013 season khan 3rd Division atanga indin thar leh niin, division sangah an kaisang chho zel a, 2015-2016 season khan first division-ah champion-in MPL play off-ah Luangmual FC an hneh a, MPL-ah kan inpetkai a ni.
MPL play off-a MPL team hneh hmasa ber kan ni nghe nghe.
Kum 2016 atangin top flight football an khel tan a, MPL 2017, Independence Day Tournament 2017, 2018, 2023 leh MFA Super Cup 2017 & 2018-ahte an champion a, top flight team zinga unbeaten record nei rei ber an ni mek bawk.
MPL U-18 2017 & 2018-ah an champion a; 2018-2019 season khan I-League second division khelin runners up an ni bakah MPL 2018 & MPL U18 2019, 2022, 2023-ahte khan runners up an ni bawk.
Club thuchhuah chuan hruaitute an inthlak a, chu chuan kalphung thar a herchhuahpui a, ngun taka an ngaihtuah hnuah ui leh hreh tak chungin top flight football chhuahsan turin thutlukna an siam ta tih an sawi a, hruaitu thar emaw enkawltu thar emaw an awm a nih chuan top flight-a Chhinga Veng FC an kirleh ngei an rin thu an tarlang a, Ramhlun Athletic FC chu duhsakna an hlan nghal.