China-in a envoy thusawi official ni lo tiin tlip

China chuan a envoy pakhatin Ukraine leh Soviet ram hlui dang te independence-ah zawhna an neih a sawi chu official thuchhuak a ni lo tiin a insawifiah.
Paris-a China ambassadror Lu Shaye chuan kar kaltaa thusawi a neih chuan demna nasa tak thlenin Beijing chu a insawifiah phah zui ta a ni.
China foreign ministry chuan thuchhuah siamin Soviet republic hlui ram tin te independence nihna chu a zahsak em em tiin a sawi zui bawk a.
China hi Russia thawhpui ram niin nikuma Ukraine ram Russia in a run hnuah pawh demna thu engmah a la sawi lo bawk.
Ukraine a remna leh muanna a awm theih nan hma la intiin ruahmanna a siam a, chutih rual chuan Khawthlang ram tena an hrek karah Russia sumdawnpui ber a ni zui zel thung a, hei vang hian Khawthlang ram te chuan China lakah rinhlelhna an neih phah bawk.
Kar kalta khan French LCI network in an interview naah Ambassador Lu chu kum 2014 a Russia in a chhuhsak Crimea chungchanga a ngaihdan dawn a ni a.
Interviewr chuan international law ang chuan Crimea chu Ukraine ram bung a ni a ti a. Hei hi chhangin Lu chuan chutianga thil chiang fak a ni lo tia sawiin Ukraine ram ang te chuan an sovereignty chhanhim turin international law te an behchhan ngawt thei lo a ti a.
“Heng Soviet ram hlui te hian sovereign ram an nihna ang leh nemngheta tichiang turin international law hnuaiah international agreement engmah a awm lo” tiin Lu chuan a sawi a ni.
President Putin chuan Ukrainian independence chu a sawihnawm reng a ni a. Nikuma Russia-in a run hma lawk pawhin Ukraine chu ‘independent ram ni tak tak lo’ tia sawiin Russia history leh culture peng niin Russia a bet tlat a ti a ni.
Chinese Foreign Ministry thupuangtu Mao Ning chuan Lu thusawi chu hnawlin Beijing chuan ram tinte sovereignty, independence leh territorial integrity leh United Nations Charters te a zah em em a ti thung a.
A hnu lawkah pawh Paris a Chinese embassy chuan Lu thusawi chu a mimal ngaihdan leh thlirna a nia China sorkar ngaihdan anga ngaih chi a ni lo a ti zui bawk.
Lu thusawi avang hian Baltic ram pathum Lithuania, Latvia leh Estonia te chuan an ram theuha China aiawh chu thu zawhfiah turin an ko zui nhgal a.
Lithuanian Foreign Minister Gabrielius Landsbergis chuan China diplomats chu an ram independence chungchangah China ngaihdan a inthlak em ni tih an zawh tur thu sawiin “Post-Sovet ram an ni lo va, Soviet Union-in dan kalha a awp beh tawh ram kan ni zawk,” tiin a sawi.
Heng ram pathumte hi kum 1940 khan USSR in a awp luih te niin kum 1991-a USSR kehchhiat khan inla hrangin mahni inrelbawl ram an ni zui a. Tun thlengin Russia chetlak dan sawisel ngam ber ber an la ni thung a, Belarus erawh Russia thlawp a ni thung.