Wagner-te hnenah Russia-in sum pe \hin ti

Russia president chuan Wagner mercenary group te chu Russia-in sum a pek leh chawm te vek an ni tiin a sawi.
Vladimir Putin chuan Wagner te hnenah hian May 2022 atanga May 2023 inkar chhung ringawt pawhin hlawh leh bonus $1 billion a pe tia sawiin defence ministry leh state budget atanga pek a ni, a ti.
Private army Wagner te kar kalta Inrinnia helna chuan Russia a luah hneh hle a. An leader Yevgeny Prigozhin pawh Russia chhuahsan remtihsak a nih hnuah Thawhlehni khan Belraus a lut a ni.
Kar kalta Inrinni khan mercenary troops te Wagner boss Yevgeny Prigizhin kaihhruaite chuan Russian city Rostov-on-Don chu lain Moscow panin an kal a, an kal kawngah Russian military helicopter an kap thla nghe nghe a ni.
Mahse, an helna te chu hun rei lo te hnuah tihtawp niin chuta tana mi pawimawh ber chu Belarus president Lukashenko a ni thung a.
Russian thuneitute chuan Wagner te chu ralthuam keng thei lova siam an nih tur thu sawiin mahse hremna erawh an pumpelh ang an ti thung a.
“Wagner fighter leh commander te hi kan zah em em thin a, a chhan chu huaisenna tawp an lantir thin vang a ni,” tiin Putin chuan a sawi.
Putin chuan Wagner te hnena sum pek dan leh an leader tena an hman dan chu enfiah a nih tur thu a sawi bawk a. Wagner group-te ralthuam liantham leh bungruate Russian army te hnena pek let dan tur ruahmanna kalpui mek a ni, tiin Russia defence ministry chuan a tarlang bawk a.
Helnaa inhnamhnawih Wagner sipaite laka thubuai siamsak tumna pawh tihtawp zui nghal a ni thung, tiin FSB secrutiy service te chuan an sawi.
Wagner fighters te hi Russia regular army an zawm thei a, an haw theia emaw Belarus an pan thei tiin duhthlan tur pek an ni a. Putin chuan Wagner fighters te chu ‘patriot’ tia sawiin hel tura fuih dik lohin an awm mai chauh a ni, a ti bawk.
Lukashenko chuan Belarus chuan Wagner group-te tan camp hran bik a siam lo tia sawiin mahse mamawh a nih chuan an siam mai tur thu a sawi thung a.
A hmain Putin chuan Moscow-a Russian sipaite hnenah Wagner te helna kara an chet lak dan avangin ‘civil war’ pumpelhin a awm theih phah a ti a. Wagner forces te chuan amry emaw mipuite thlawpna an nei ngai lo a ti bawk a. Mahse, a tak takah erawh Wagner tena Rostov-on-Don khawpui an chhuahsan laiin mipui ten zah takin an thlah liam thung.
Wagner mercenary te laka Russia sorkar chet lak dan nem tak chu oppostion politician leh activists te tam tak Ukraine indona duh lo zawnga an tawng avanga lung ina khung mekte nen chuan a inang lo hle.
Opposition activists Vladimir Kara-Murza chu Ukraine indona a sawisel avangin phatsantu tiin kum 25 lung in tang tura tih a ni a. Chutih laiin helna chawkchhuaka silai leh ralthuam cheleka chet la Wagner chief Prigozhin leh a hote erawh chhuah zalenin an awm thung.
Wagner group te hi kum 2014 khan hriat hlawh tan an ni a, eastern Ukraine-a pro-Russian seperatist te thlawptu an nihna atanga hriat hlawh tan niin he mi kum vek hian Russia-in Crimea a laknaah suklsutu an ni bawk. Hei bakah hian Africa leh Middle East-ah pawh Russia aiawhin an kal thin.
Ukraine indo hma khan Wagner te hian fighters 5,000 vel an neia chungte chu Russia elite regiments leh special forces hlui te deuh vek an ni. Mahse, a hnuah an pung ta teuh thung a. Yevgeny Prigizhin chuan sipai 25,000 neiin a inchhal zui a ni.
Mercenary forces te hi Russia-ah chuan khap a ni a, hei vang hian Wagner te hi kum 2022 khan company angin an inziak lut a. US chuan January 2023 khan ‘transnational criminal organisation’ tiin a puang zui a ni.
Prigozhin chuan kum 2014-ah Wagner group te a din a nih thu a sawi a, mihausa leh misual hlui lung in tang hrep tawh a ni a, Kremlin catering tithintu a nih avangin ‘Putin’s chef’ tia hriat lar a ni bawk.
Mahse, BBC tena an chhuichiannaah Wagner group-a sulsutu ber pakhat chu Russian army officer Dmitri Utkin a ni an ti a. Chechnya-a Russia war veteran niin Wagner first field commander nia ngaih a ni bawk a, Wagner tih pawh radio call sign an hman thin hming chawia a phuah tia sawi a ni.
Wagner sipai tam zawkte hi lung in tang misualte niin 80% lawih an hauh tia sawi a ni bawk.