City chakpuitu Erling Haaland

Inrinni zana English Premier 2022-23 khelhah champion lai Manchester City chuan Erling Haaland penalty hmangin Crystal Palace an hneh hram a, hmahruaitu Arsenal an hneh. Inrinni zana inkhel dangah Chelsea an chak a, Everton pawhin si khat faia hnehna changin relegation zone an chhuahsan ve bawk. Kar tawpa EPL result hrang hrang kan hrut kual ang.
City chakpuitu Haaland
Champion lai Manchester City chu Crystal Palace hmachhawn turin Selhurst Park-ah an lenglut a. Palace lakah goal thun turin minute 78 thleng an nghah a ngai a, vanneihthlak takin point thum an hmu hram a, hmahruaitu Arsenal an hnaih theih phah.
City hian mualneitu Crystal Palace an nawr viau a, ball chang tam zawk leh goal thun theihna hun tha ngah zawk ni reng mahse goal an thun thei bik lo. Phil Foden chuan tha zetin free kick chhuih mah se goal kham a pet per. Chawlhlawk hmaa an hun tha bera chhal ngam chu Erling Haaland chuan mak takin a thelh teh tlat a, goal kham chungah a petchhuak luah. Haaland hian a hun tha neih pawh uiawm takin a hlah zui leh bawk.
Chawlhlawk hnu lamah City an khel tha chhunzawm zel a, goal thun ngei tumin tan an khawh. Manager Pep Guardiola chuan Haaland la chhuak chuang lovin forward Julian Alvarev a dah lut. World Cup-ah Argentina champion puitu Alvarez hian uiawm takin a hun tha a hloh a, City vanduai a kal tluang. An hun tha an hlah fo hnuin City goal thun theihna hun tha zawk an hmu ta nge nge. Minute 78-naah Ilkaay Gundogan chuan penalty a hlawhchhuak. He penalty hi Erling Braut Haaland chuan chiang zetin a pet goal a, hmahruaina goal a thun. Haaland hian EPL season kal mekah goal 28 a thun tling tawh a, season khatah EPL a goal thun hnem ber ni turin goal sarih thun belh a la mamawh.
Haaland goal thun hnu hian goal dang an luh belh tawh lova, City chuan harsa taka hnehna changin, point thum hlutak an hlawchhuak. City laka tlawm Crystal Palce hian an khelh hnuhnung pathumah shot on target (goal zawna pet) an nei miah lo va, mumal taka chhinchhiah a nih hnuah Crystal Palace hi EPL-ah game thum chhung shot on target nei thei lo hmasa ber an ni.
Chelsea in chak an thiam tan
Thlasik bazarah sum an sen hnem fal em vangin Chelsea lakah beiseina a sang a, player an neih that em vangin chak pup pup tura beisei an ni. Beisei anga result tha an neih theih loh vangin sawisel an hlawh hman viau a, manager Graham Potter ngei pawh a dinhmun a derthawng hman hial. Sawiselna nasa tak tawk hman mah se an player tharte an tlangnelin, an inman chho a, Chelsea in chak an thiam chho tan a, Vawi thum an chak zawnna ni turin King Power Stadium-ah 3-1 in Leiocester City an hneh.
King Power Stadium-a lenglut Chelsea hian bul an tan tha a, minute 11-na lekah Ben Chilwell chuan a club hlui lakah Chelsea hmahruai na goal a thun nghal. Hma takah goal an thun vangin inrintawkna sang zawk nen an inlan a, goal hnih an thun belh zui leh bawk.
Hma takah goal chhuah mah se mualneitu Foxes an buai mai lova, minute 39-naah Patson Daka chuan goal thunin an si phurh a sut. An khingpuite nen inhneh-tawk thar leh mah se Blues in goal dang an thun belh leh thuai a, Minute 45+6-ah Kai Havertz chuan hma an hruai nawn lehna goal a thun a, 2-1 a hmahruai chung in chawlhlawk an hmang zui ta a ni.
Chawlhlawk hnu lamah Chelsea an khel tha chhunzawm zel a, minute 78-naah Mateo Kovacic chuan an goal thumna thunin an hmahruaina a tizau. An si phurh sut tura goal thun an mamawh em em laiin Leicester player Wout Faes chu minute 87-naah hnawhchhuah a ni a. An mikhual Chelsea lakah 3-1 in an tlawm zui ta a ni.
A him chinah Everton
Inrinni zana inkhel dangah Everton chuan Goo-dison Park-a an mikhual Brentford chu 1-0 in an hneh a, regelation chhuahsanin 15-naah an inhlangkai.
Everton hian Goodison Park-a an mikhual Brentford lakah tha chungchuang takin bul an tan a, inkhel tan atanga minute khatna lekah Dwight McNeil chuan hmahruaina goal a thun nghal a. Minute khatnaa an goal thun hi an chakpui a, point thum hlu tak hmuh nan an hmang. An muala point thum an hmuh hmangin Everton hian khelh 27 atanga point 25 hmuin 15-naah an inhlangkai a, hmun himah awmhmun an beng bel.
Inkhel dangah Tottenham chuan Nottingham Forrest chu 3-1 in an hneh a, palinaah an insawh nghet. Tottenham tan hian Harry Kane chuan goal hnih a thun a, Son Heung-Min chuan goal khat a thun ve bawk. Nottingham Forrest goal neih chhun hi hun tawp dawn tep minute 81-naa Joe Worrall thun a ni ve thung.