Inneih hmaa hriat tur

Inneih hmaa hriat tur
Hmangaihna hian mi a bum thei ve fu mai a, chuvangin nupui pasal neih hmain rilru fim taka inngaihtuah a ngai a, thutlukna dik lo kan siam palh hlauh chuan, kan inneih tawh miau bawk si chuan buaithlak thei viau dawn a nia!
1. I thlak danglam thei lo. Kan inneih hunah ka siam tha thei ang, tih chu tih mai mai. A nunphung i thlak tak tak thei lo, mahse, hmasawn tur erawh chuan i pui thei. I duh ang i nih tir theih i ring a, mahse, chutiang chu a thleng thei dawn lo. Tuna a nihna ang khan i pawm dam thei lo a nih chuan nei lo zawk law law mai la i ti fuh zawk ang.
2. Engmah tilui suh. Inngaihzawn tan tirh chuan kan inhmangaih em em niin kan hria a, mahse, kan inkara tek deuh sek sek chu a lo chuai telh telh a, a chang chuan a bo daih thei. Inhmangaihna boruak chu chawi nun leh theih a ni a, chutiah rualin kan inkar chu tihtawp a tha zawk pawh a ni ve thei tho. A bula awm chu nuam i la ti reng a, mahse, ‘chemistry’ kha a awm tawh lo tak tak a nih chuan engmah i tilui thei lo. Tih luih pawh a fuh lo thei zawk ang.
3. Nangmah inhmangaih hmasa phawt rawh. Midang hnena inzawmna nghet leh hlawhtling nei tur chuan nangmah i inhmangaih thiam phawt a ngai. Nangmah pawh i inhmangaih thiam loh chuan engtin nge midang i hmangaih theih ang? Nangmah i nihna anga i hlim zawh poh leh midang i tihlim thei dawn a ni.
4. Nangma thu kha a pawimawh ber. Nupui pasal neih dawn chuan uluk takin ngaihtuah la, tha i ti tak zet em? Midang thurawn leh ngaihdan lak te pawh a pawilo, mahse, a pawimawh ber chu nangma ngaihdan kha a ni. In inkarah eng emaw dik lo riau awma i hriat chuan ngaihthah mai mai suh.