CJ a tawt; chawngheia nuar an awm Lunglei Jail-ah tang tlanchhuak

CJ a tawt; chawngheia nuar an awm
Lunglei Jail-ah tang tlanchhuak
Central Jail a tawt a, tang zingah court hun thlen har avanga chawngheia nuar mek an awm. Hetihlai hian Lunglei District Jail lamah thawktu an indaih lo hle a, jail tang tlanchhuak an lo awm ve bawk.
The Aizawl Post-in thu a dawn danin, Central Jail mipa ward hi tang 438 awm theihna tura ruahman a nih laiin tunah tang hi a let, 849 an awm a; hmeichhe awmna – Central Women’s Jail hi tang 96 awm theihna tura ruahman niin, tunah 266 an tang mek. Aizawl District Jail chu mi 90 tang thei tura ruahman a nih laiin 149 an tang mek bawk.
Central Jail bikah hian vengtu mi 80 chuang awm tur an nih laiin, vengtu mi 18 vel awrh an awm chauh nia sawi a ni a. Jail tang 849 chuang veng tur hian chhun leh zan lamah a chhawka duty an awm a ngai a, an indaih lo hle nia thu dawn a ni.
Central Jail-a tang zingah hian ND&PS Act 1985 hnuaia thubuai siamsak, court hmaa inlan tur, court-ah pawh hruai thin, la inlan hleithei lo mi 40 chuang an awm a, heng mite hian an chungthu ngaihtuah ran phutin chawingheiin an nuar ve mek bawk.
The Aizawl Post thudawn danin, ruihhlo tawlhruk/ kawl thubuai neih avanga Centrail Jail-a awm mek, an chungthu court-in a ngaihtuah hun tawh chunga court-in a la koh loh avangin mi 40 chuang chuan April 13 atang khan an tanna hmunah hian chawngheia nawrh an huaihawt. An hriselna dinhmun ngaihtuah an awm rih lo nia hriat a ni.
Court hian thubuai khawih tur tam tak a neih avangin tuna tang zinga nuar mekte hi an la ko thei lo nia sawi a ni a. Ruihhlo tawlhruk thubuai avanga court-in an chungthu a rel turte hi mi 45 vel niin, a tam zawk chu anmahni kut atanga ruihhlo an man ni lo, an in leh lirthei vela an man a ni a. Chawngheia nawrh tum zinga mi 5 erawh an kut atanga man an nih avangin nawrhin awmzia a awmin an hre loa, an nuar ve ta lo niin thudawnna chuan a sawi.
April 19 zing khawvar hma khan Lunglei District Jail atangin tang 5 an tlanchhuak nia sawi a ni a, zawn mek an ni.
Thudawn danin, zing dar 1.30 vela Jail duty-in ward a fan lai chuan tlanchhuak ta te hi an la awm vek a, hemi hnu lawk zing dar 2.15 velah an tlanchhuak tih hriat a ni. Ward No.2-a awm an ni a, ek in bang brick rem chu mihring leng tawka tichhiain an chhuak a, jail hungna lungbang sang chunga thirlen zamah an putchhuak a ni.
Jail atanga tlanchhuak an awm tih hriat a nih veleh zawn nghal an ni a, khua a var hnua an tlanchhuah hnuhma enchiannaah jail hungna hmun hnih atanga chhuak an nih rin a ni.
Sazaikawna District Jail hi a hungna hrulah duty post 7 awmin, tun dinhmunah duty post 3-ah chiah Home Guard duty-tir an ni a. Thawktu indaih loh vangin duty post 4 chu dah tawl mai mai nia thu dawn a ni. Jail hi mi 109 awmna tura tih a ni a, mi 151 an tang mek. Ward pakhatah mi 27 awm tura tih a nih laiin mi 60 an awm mek bawk. Hmeichhia tang 16 an awm a ni.
Thudawnna pakhat chuan Lunglei District Jail ah hian thawktu an indaihloh avangin jail tang zinga thenkhat chu a chhunga duty ngaihna thenkhatah duty tir thin an ni. Tun dinhmunah ambulance tih loh lirthei dang an nei lo a, ambulance pawh hi a khalhtu tur driver an nei chuang lo nia sawi a ni.
Lunglei Jail atanga tlanchhuakte hi, kum 2021-a Lunglei Chanmaria nu pakhat vit hlumtua puh Lalchawimawia (24) tih loh chu ruihhlo vanga man vek – Lalbawihliana (27) Zokhawthar; Dokapthang (26) Zokhawthar; Haudeihchhin (25) Tlangnuam Champhai district leh Vanneihthanga (38) Leisen Mynamar te an ni.