CJP leh sorkar inbia, sorkarin ni khat hun dil

Cockroach Janta Party (CJP) aiawhte leh sorkar an inbiak hnuah pawh mi sang telin Indian education minister bân phutna an la lantir chhunzawm.
CJP thupuangtu, Ashutosh Ranka chuan thuthar lakhawmtute hnenah sorkar hian an thil phut lian ber, Minister Dharmendra Pradhan-a bân chungchangah ni khat nghak turin an ngen tih a sawi.
“Lungawi loh lantir hi chhunzawm zel a ni dawn a, Dharmendra Pradhan-a a bân hma chu kan kal zel ang. A thleng thuai lo a nih chuan ram pum huapa nawrin kan kalpui ang,” a ti.
Lungawi loh lantirna hi thla khat chuang kal ta atanga lantir an ni a, Thawhtannia parliament pana kawng an zawhnaah police nena an innawr hnuah boruak a lian zual.
Online-a movement kalpui, CJP-in an kaihhruai pun khawmnaah hi thalaiten thil hrang hranga ngaihsak an hlawh lohna thilah a kang kai zel.
CJP thupuangtu dang, Saurav Das-a chuan an thil phut dang pahnihah chhanna lawmawm lam an pe tih a sawi a. Hengte hi May thlaa damdawi zirna ina lut tur zawnna exam thulh leh avanga intihlum chhungte zangnadawmna pek leh parliament pana kawng zawhte laka police-in thubuai an siamte hlih a ni a. Inrinniah an inkawm leh dawn tih a sawi.
Union Minister JP Nadda chuan thuthar lakhawmtute hnenah CJP hnenah hian ‘sorkar inrawna sawiho hnuah Inrinnia inhmu leh turin kan ti’ tih a sawi.
CJP leh sorkar inbiak hma zan, Ningani zan khan activist Sonam Wangchuk-a chuan lungawi lote thlawp nana ni 26 chhung chaw a nghei a titawp bawk.
Hemi hma leh lawkah hian Prime Minister Narendra Modi-a chuan video dah chhuakin lungawi lohna lantir chhan ber, exam zawhna puta mawhphurtute chu hrem an nih tur thu a sawi bawk.
Tun tum thil thleng hi Modi-a sorkar tana chona lian niin a tir lam hun eng emaw chen chu an ngaihsak lo.
Inrinni khan thuneituten Wangchuk-a chu lungawi loh lantirna hmuna chaw a ngheina atangin damdawi inah a dinhmun avangin an sawn lui a, hei hian thawm a nei lian hle.
Ni hnih hnuah Delhi-a police-ten thalai kawng zawh chu tharum nen an tilet zui a, hei phei hi chuan boruak a tilianin vantlang thinrimna a thleng.
Ningani zan khan Modi-a chuan video dah chhuakin lungawi lo, Instagram hmang nasa tak takte hriat turin zawhna put mawhphurtute hremna tur dan khauh siam tur buaipui mek a ni tih a sawi.
Dan hi a draft a dawng tawh a, parliament-ah pharh thuai a ni dawn tih a sawi.
Exam zawhna put hi India-a sawi hlawh tak a ni sa a, tun hnai kum eng emaw zat chhungin a put nasa hle a. Tun tuma mi hi medical entrance exam, National Eligibility cum Entrance Test (NEET) zawhna a ni.
May 3 khan zirlai maktaduai 2.28 dawnin an exam a, a hnuah zawhna a put tih hriat a nih avangin cancel a ni a, exam that leh a ni.
Modi-a’n thu a chhuah hnuah pawh CJP chuan Pradhan-a bân an phutna an titawp dawn lo tih a sawi. “Hmalak ngei a tiam a, a tih theih tha ber chu a education minister bân a ni,” tiin Ranka chuan Zirtawpni chawhma khan BBC a hrilh.
Wangchuk-a chuan sorkarin Jantar Mantar-a lungawi loh lantirtute leh parliament pana kawng zawhte laka dan anga thubuai siamsak loh an tiam hnuah chaw nghei a titawp tih a sawi.
NEET zawhna put chungchangah examination kalphung tihthat leh siam that dan tur parliament-a sawiho an tiam bawk tih a sawi a. Pradhan-a bân an tiam em tih a sawi lo thung.
A chaw nghei a tihtawp hnuah CJP dintu, Abhijeet Dipke-a chuan lawmawm a tih thu a sawi.
Zirtawpni pawh khan Jantar Mantar-ah pungkhawm awmin an thawm a la bengchheng hle a. A hma zanah pawh kawngpuiah leh kawng sirah muin an awm tlaivar a, Pradhan-a bâng tura tihna leh Modi-a chu bân tura tihna an aupui.