CM award dawnin sawi zui hlawh

Mizoram chief minister-in USA-ah award a dawng a, hemi chungchang hian sawi a hlawh hle. Social media lamah titi a tling a, a certificate-a chief minister hming inziahnaah mi dang hming ziak langin, ‘chumi pawhin a dawng’ tiin social media-ah fiamthu a darh hle.
Certificate-a a lan danin, he award hi President’s Lifetime Achievement award a ni a, USA tana darkar 4,521 a thawh avanga chawimawina a ni tiin a inziak.
US president hnen atanga award a nihna hian sawi zui a hlawh a, USA tana darkar 4,521 tha leh zung senga thawktu hnena hlan a ni tih a ni hian sawi zui a hlawh bawk.
Certificate chunga chief minister hming inziah danin mak tih a hlawh a, “The Honorable Mr Lalduhoma” tiin a inziak. A ziaktu hawrawp chhiat thuin mak tih a hlawh bawk.
Chief minister Lalduhoma hi USA-ah Mizo Day hmangin a thang mek a, he award hi Mizorama September ni 3, USA-a ni 2-ah khan a dawng a ni.
Chief minister hian instagram-ah a post a, mahse a hnu-ah a paih (delete) leh. Hei hian titi a siam zui bawk.
Thu dawn danin, US khua leh tuite tan hian ram tana an hnathawhte chhinchhiahin hetiang award, dil theih hi a awm a, US sorkarin chutiang chu a pe thin.
USA lama Mizote’n an sawi fiahna, social media-a darhah chuan he award hi US India SME Council te’n White House-ah Mizoram chief minister hi an dilsak a, a certificate dawn tur a thlen hmain, Mizo Day-a hlan an duh si a, social media-a darh ta certificate hi an hlan ta a ni. A certificate tak tak chu kar khat vel hnuah Indian Embassy-ah a thleng tura beisei a ni an ti.