MSWC chairperson ruat danah dan diklo a awm lo – Social Welfare minister

Mizoram State Commission for Women chairperson ruatnaah dan dik lo tih an nei loa, chutihrualin tuna chairperson puhna chu zirchian mek a ni tih Social Welfare minister Lalrinpuii chuan a sawi.
Thuthar thehdarhtute zawhna chhangin Social Welfare minister chuan, Mizoram State Commission for Women (MSCW) hi dan fel tak hnuaia din, chairperson leh member-te pawh chumi dan hnuaia ruat tur a ni tih a sawi a. Tuna chairperson nilai hi Mizoram sawrkarin Women Commission atana ruat a tum laia a biodata leh document thehlut tura tih a nih angin, a birth certi?cate a thehluhah kum 1960-a piang a ni a, hemi ang hi chuan hetihlai hian kum 65 a la tling lo tih a sawi.
MSWC chairperson hi a thawk tha hle a, he hna a chelh hnu ah case tam tak an chingfel tawh a; chutihrualin tuna a chunchanga sawi awm chu zirchian mek a ni tih a sawi.
Zawhna chhangin minister chuan, huntiam neia chairperson ban tura nawr chungchangah an department chu a tibuai loa, dan ang zelin an kal mai dawn a, chumi tur chuan tunah an zirchiang mek tih a sawi a ni.
Social Welfare hotute sawi danin, MSWC chairperson tura ruat dawna an en chu, a birth certificate thehluh a ni a, chutah chuan kum 65 a la tlin loh avanga ruat a ni tih an sawi a. Hetihrual hian tuna an inkaihhruaina hman hi central kalhmang a ni a, Social Welfare chu central list hnuai a nih loh avangin state-in a duh angin a kalpui thei a, state dangah pawh upper age limit-ah kum 70 thleng an phal laiin, lower age limit-ah chuan kum 40 tling tawh, tih chauhte an lo an dah tih an sawi.
MSWC member ruat danah sawrkar order hmasaah MSCW Act emaw MSCW Rules hnuaia ruat (appoint) an ni loa, ‘nominate’ chauh an lo ni a, sawrkar executive order ang chauha member ni an lo nih avangin, executive order vek hmangin member hi thlak an ni tih an sawi. Chutihlaiin, case tam tak an lo ngaihtuah tawhte kha thutlinga pawm a nih theih nan tuna order tharah hian an thurel tawh kha thutling a ni tiin, an daikhalh nghal zawk tih an sawi a ni.