CSS hnuaia Mizoram sawrkara thawh mekten an thil phut tih hlawhtlin ngiata hna thawk loa nawrh an kalpui mek chu chief minister intiamna avangin vawiin, June 27 atang hian an tawpsan lailawk dawn.
June 26-28 chhung pen/tool down strike neia nuar tan All Mizoram CSS Employee Coordination Committee (AMCSECC) aiawhte chu Thawhtanni khan chief minister sawmna angin a office-ah inkawmin sawrkara an thil phut te an sawi.
Chief minister hian regularization/ absorption scheme siamsak bakah sawrkar hna nghet lakah CSS-te tan reservation siam, CSS te tan Recruitment Rules tha tak siam chu kumin July thla chhung ngeia Cabinet meeting-a ngaihtuah a, tih hlawhtlinsak a tiam tih AMCSECC hruaitute hian an sawi a. Chief minister intiamna ang hi an pawlin an ngaihtuah ho leh hnu ah, nawrh an kalpui mek chu July 27 atang hian tihtawp lailawk a, July thla chhunga chief minister-in a tiamte hi Cabinet meeting-in a pawm sak lo a nih chuan an awm dan tur ngaihtuah that leh nise, an ti.
‘Mizoram sawrkarin kan tana a siam Study Group on CSS report/ recommendation kum hnih dawn sawrkarin a up beh avanga sawrkar laka kan lungawilohna kan lantir avanga mipui tawrhna kan hriatin pawi kan ti hle a, mipuiin kan harsatna min hriatthiam puinaah lawmthu kan sawi a ni,’ AMCSECC chuan a ti.
CM intiamna avangin nuar mekten tawpsan lailawk dawn
Get real time updates directly on you device, subscribe now.
Next Post