Congress-in nuai 2-in ‘tang’ puih tum; tang thei lote pawh pui dawn

Sawrkarna an chang a nih chuan eizawnna kawnga ‘tangte’ chu cheng nuai hnih emaw a aia tamin emaw an pui dawn a, tan nachang hre lo leh tang thei lote pawh an pui dawn tih Congress party chuan an sawi.
MPCC thupuangtu Dr Lallianchhunga chuan kumin MLA inthlanpuiah an party-in sawrkarna a siam a nih chuan dinchhuah tuma tan la mekte leh theihtawpa tan lak tum zawng zawng chu ‘Tang Puihna’ hmangin an mamawhna zawn takah tanpuiin, dinhmun tha zawkah chhungkaw tin dah an tum tih a sawi.
Tang Puihna huangah hian dinchhuah ngei tuma tan lak tumte emaw tan la mek tawhte chu an mamawhna zawnah tanpuina cheng nuai 2 emaw an mamawh dan azirin a aia tam pawh an pe dawn tih a sawi a. Thlai chingtute tan thlai chi, khawl mamawh, leitha leh rannung laka venna pek te; ran vulhtute mamawh ran chaw man tlawm zawka pek a, ran vulh tur thlenga ngaihtuah sak te; sumdawnna bul tan duh, ruahmanna fel tak neite bul tanna tur tumsakin, bul tan tawhte pawh an mamawhna zawnah an pui dawn tih a sawi a ni.
Thalai leh zirlai, eizawnna tlak thiamna bik mamawhten an mamawh ang thiamna an neih theih nan ‘Tang Puihna’ hnuaiah hian zirna leh training chi hrang hrang an buatsaih sak dawn tih a sawi bawk.
Heng mimal ni lo, a huhoa hnathawktuten district level, constituency level, block level, khua leh veng, society/ association /Zau ang zawnga an mamawh intawm chi hrang hrang – kawng, kudam, tuilakna, cold storage, sawngbawlna adt siamna atan cheng vaibelchhe tel tanpuina pek theih a ni dawn tih a sawi a. Hei hi Congress sawrkar hmasaah pawh NEDP hnuaiah nasa taka kalpui a lo nih tawh thu a sawi.
Tan nachang hre lo, dinchhuah tuma tan lak nachang hre lo leh beidawng tawhte chu sawrkarin zirtirna leh kaihhruaina fel tak pe in, ram nei loten ram an neih theih dan turte, ram leilung behchhan kher lo pawha ei an zawn theih dan turte ngaihtuahsak an ni dawn tih MPCC thupuangtu hian a sawi a. Tang thei lo, dinhmun pelh laklawh, harsatna bik nei, hnathawk thei tawh lo, chawmtu nei mumal lote chu a bika tanpuina siamsakin, thla tina an mamawh zualpui an hmuh theihna tur tanpuina pek an ni dawn tih a sawi bawk.
Tangte an puihnaah an tharchhuah leh siamchhuah hralhna tur chu sawrkarin a ruahman sak dawn a, chu chu he ‘Tang Puihna’ policy tum ber pakhat pawh a ni tih a sawi a. A tul a nih chuan state chhunga thar leh siam a hnawn lohna’n state pawn atanga lakluhte control a ni dawn tih a sawi a ni.
“Tang Puihna hi sem policy nen a danglam daih a, a danglamna chu, a mamawh tak takte chauh tanpui an ni anga, a mamawh lote hnenah pek a ni ve dawn lo. Congress party-in kan ti ang kan tih chu kan tih mai thin avangin kumin inthlanah Congress party-in sawrkarna kan siam chuan chhungkaw tin, mimal tinin nasa takin hma kan sawn ngei dawn a ni,” Dr Lallianchhunga hian a ti a. Heng atana sum mamawh chu budget-a dah theih vek a nih bakah central scheme nen pawha thuikhawm leh thlunzawm theih tam tak a awm thu a sawi bawk.