Country Icon Tobey Keith a thi

Country singer hriathlawh tak Tobey Keith, kum 62, chu an rama February ni 5 khan pum cancer avangin a thi a, a website-ah a thih thu hi an nemnghet a, chutah chuan a natna chu chhel leh huai takin bei let mah se a tlin ta lo niin an tarlang. Tobey Keith hi a laina hnai ten an dawm hlum a ni.
Keith hian 2021 khan a cancer thu hi social media kaltlangin a puang a, “Thla ruk chhung chu chemotherapy, radiation leh leh surgery hmangin enkawlna ka dawng tawh a. Tunah chuan ka tha sawt viau e. Hahchawlh a, awm dam deuh ka mamawh. Ka chhungte bula hun hman ka thlahlel rih ber a ni. Mahse, fans lam pawh kan inhmu leh thuai ang. Chutiang hun chu ka nghakhlel khawp mai,” a ti.
Mahse, thla nga hnuah pawh Keith chu a la chak hleithei lo, “Dam turin chawlh hahdam ka mamawh rih a ni. Heng thil ka paltlang zozai hian min tichauin min tizawi ve raih mai. Mahse, a tha ber beisei ila, kan tha hle thuai ang,” tiin November 2022 khan CMT Hot 20 Countdown episode-ah a puang leh ta a ni.
Nikum September khan 2023 People’s Choice Country Awards-a Country Icon Award hlan a ni a, hetah hian a perform nghe nghe a, ‘Don’t Let the Old Man In’ tih hla hnuk ulh teuh chungin a perform a, he hla hi pa pakhat thihna hmachhawn mek chungchang a phuahna niin, Clint Eastwood film siam ‘The Mule’ film tana a phuah a ni. Country Icon Award a dawn avanga lawmthu sawiin Keith chuan, “Zanina heta min tel tir ve theitu Chungnungbera hnenah lawmthu ka sawi a ni. Ani hi tun hnai eng emawti chhung chu min vengin ka kiangah ka awm ve reng a ni,” a ti.
Beer For My Horses tih hla satu, country music icon, Tobey Keith hi country music khawvela huhang nei lian ber te zinga mi niin, a hla dang ‘Courtesy of the Red, White and Blue (The Angry American),’ tih hla leh ‘Made in America’ tih hla te pawh an sa lar tawh kha a ni a, mipui hmaa a perform hnuhnun ber chu December ni 14 kha niin, nikum December ni 10-11 leh ni 14-ah te ni thum awh concert Dolby Live at Park MGM, Las Vegas-ah a nei a, he concert a zawh hnu lawk atang hian zual panin, tun hi a thleng ta a ni.
Toby Keith hi July ni 8, 1961 kan Clinton, Oklahoma-ah a piang a, a hun hmasa lamah oil industry-ah thawkin, USFL football league-a te pawh a tel kual ve zak zak tawh a. Chumi hnuah rimawi lamah lutin, a beisei angin thil a kal thei lem lo. Kum 30 a tlin hmaa contract a hmuh loh chuan rimawi chawlhsan leh mai a tum a, chutiang boruak karah chuan flight attendant pakhatin a demo chu Mercury Records executive Harold Shedd a lo ngaihthla tir a, ani hian a label hnuaiah a ziak lut ve ta a ni.
Keith hian 1993 khan a hming chawiin a album hmasa ber a tlangzarh a, he album-a a hla ‘Should’ve Been a Cowboy’ leh ‘A Little Less Talk and a Lot More Action’ chuan a vawrh lar ta a ni. A hla sak te hi ama phuah a nih loh pawhin midang nena an phuah dun a ni deuh zel a, heng hla te pawh hi country hla ngaihthlak nasat zual zingah an tel ta hial a ni.
1994-ah a album pahnihna ‘Boomtown’ leh 1996-ah ‘Blue Moon’ te a tlangzarh leh a, a rimawi zinkawng a kal tluang hle a, a hla hit ‘Who’s That Man’ chu Billboard Hot Country Songs chart-ah No.1 kaiin, ‘Big Ol’ Truck’ chu No.15 a kai a, ‘Does That Blue Moon Ever Shine on You?’ pawh No.2 a jai a, ‘Me Too’ chu No.1 a kai leh bawk a ni.
A album palina ‘Dream Walkin’ pawh a hlawhtlin pui leh viau a, Billboard Country Songs Chart top 10 a lang thei hla dang ‘We Were In Love ‘ (No.2), “I’m So Happy I Can’t Stop Crying” (No. 2) leh a album title track (No. 5) an kai leh a ni. 2001-ah a album pangana ‘Pull My Chain’ tlangzarh lehin he album-ah pawh hian hot country chart a No.1 kai thei hla pathum ‘I’m Just Talkin’ About Tonigt,’ ‘I Wanna Talk About Me,’ leh ‘My List’ te a neih leh bawk.
2001-ah Academy of Country Music Awards-ah top male vocalist leh album of the year a dawng a, 2003-a a album ‘Unleashed’ a Willie Nelson nena an duet-na ‘Beer for My Horses’ chu Billboard Hot 100 chart-ah No.22 aiin, hei hi he chart-a a thlen san ber a ni ta a ni.
Keith hian album 19 a tichhuak hman a, amah hi American zet mai niin, ram leh hnam vei mi a ni bawk nen, a hla ‘American Soldier’ leh ‘Made in America’-ah te pawh hei hi a hriat theih a, US sipai support tlattu niin, US sipai ramdang hmun hrang hrang awm te tlawhkualin, sipai te chawk phur turin a perform thin a, hetiang hian vawi 11 zet tour a nei nghe nghe a ni.
Love song lamah pawh a hla “I Love This Bar,’ ‘Whiskey Girl,’ ‘I LIke Girls That Drink Beer,’ ‘Get Drunk and Be Somebody’ leh ‘Red Solo Cup’ te pawhin hriat a hlawh viau a ni.
Keith hi 2015 khan Songwriters Hall of Fame-ah lakluh niin, 2021-ah Nashville Songwriters Hall of Fame-ah lakluh a ni bawk a, 2020 khan Merle Haggard Spirit Award pawh ACM-in an hlan a, 2021-ah National Medal of Art a dawng tawh bawk.