Cricket tournament-ah Field Veng Branch chak

Central YMA leh Cricket Association of Mizoramte’n an buatsaih Inter Branch YMA Cricket Tournament 2024 khelh mekah nimin chawhnu dar 1 khan MAP Ground Mualpuiah Thenzawl Field Veng Branch chuan an match hmasa ber khelin, Sairang Branch chu run 5-in an hneh.
Tunhma lamin Thenzawl hi Mizoram pum huap inelnaah an la chhuak ngai lo a, kum 2018 atang khan mi thahnemngaite hmalaknaa cricket club din a nih hnuah Serchhip District huap inelnaah Thenzawl Cricket Club hmingin tum engemawzah an lo chhuak tawh a, state inelnaah erawh an la chhuak ngai lo a ni.
Inter Branch YMA tournament-ah hian Field Veng Branch chu toss-ah chak zawkin bat an thlang a, over 16.1-ah run 81 siamin an out vek.
Sairang branch-in bat ve lehin, over 16.1-ah tho out zo vekin run 76 an siam ve thung a, Thenzawl hi run 5-in an chak ta a ni.
He inkhelhah hian Thenzawl player Jimmy LH Zuala chu ‘player of the match’ atan thlan a ni.
Thenzawl Field Veng Branch hi Group G-ah awmin, super knockout-a khelh a ni a, Zemabawk East leh Tlangnuam West Branch-te inkhela chak zawk nen second round-ah an intum leh ang.