Dan rorelna hmanga khalh ngil ngaiin thuneihna an hmangsual – J Malsawmzuala

Dan rorelna hmanga khalh ngil
ngaiin thuneihna an hmangsual
– J Malsawmzuala
ZPM sawrkar chu dan rorelna, judiciary hmanga khalh ngil ngai khawpin thuneihna a hmangsual nasa tih MNF hruaitu J Malsawmzuala Vanchhawng chuan a sawi.
Zirtawpnia Mizo Hnam Runa inkhawmah MNF Publicity Board vice chairman J Malsawmzuala chuan, ZPM sawrkar kum khat leh thla hnihah hian thuneihna hmanga mipui palzutna leh rahbehna a thleng tam ta hle tih a sawi.
“Mipui rorelna tinghettu leh timawitu chu ngaihdan inang lo neite inzahtawn thiam a ni. ZPM sawrkar chuan an rilru ang pu ve lote reng reng nuaibo leh rah beh an tum ta zel tih a lang a. Nimin maiah pawh ZPM sawrkarin a thuneihna hmangsuala Hnahlan leh Thekpui VC a thiahna thupek chu Gauhati High Court-in a paihsak tawl mai a. Dan rorelna, judiciary hmanga khalh ngil ngai khawpa ZPM sawrkarin a thuneihna a hmangsual nasa nghal mai hi mipui rorelna, democracy ramah chuan thil zahthlak tawp a tling,” a ti.
VC term pawhtawi thupekah a chhan leh vang tarlan a ni miah loa, sawrkarin a thuneihna lek khumin a pawt tawi tawp mai niin MNF general secretary J Malsawmzuala hian a sawi.
“VC-te hi kum 5 term atana mipui thlan an ni a. Kum 5 chhung VC tura inngai an nih lai a, chhan leh vang sawi awm lo, anmahni rawn bawk si lo, sawi ve tur an neih sawina hun pawh siamsak lo, political party dang biakrawn pawh awm chuang loa, sawrkarin a thuneihna lekkhum a, an term thla 6 chuanga a pawh tawi sak tawp mai hi mipui rorelna beihna langsar tak a ni a, hun lo kal zel turah sulhnu pawr leh zahpuiawm tak a ni reng tawh dawn a ni,” a ti.