Darzo khua tana tuihna tih punna tur project tan dawn

Bharat Forge leh Confederation of Indian Industries (CII) ten Darzo khuaa tuihna tihpunna tur project, CSR (corporate social responsibility) Fund atanga an thawh tur chu Nilaini khan adviser to CM, CSR Cell chairman TBC Lalvenchhunga, MLA chuan a khuhhawng.
He CSR Project hmang hian Darzo khaw ram hectare 1.93 a zauah ruahtui tlinna tur khur (trenches) 1000 laih tur a ni a. Hna hi Young Indian Mizoram Chapter-in an enkawl ang. Young Indians hi CII hnuaia thalai pawl an ni a. Young Indians-in hetiang lam chi CSR Project an thawh hmasak ber tur a ni.
Adviser to CM chuan, Darzo khuaa tuihna tihpun (Ground Water Rejuvenation) project an kalpui avangin Bharat Forge chungah lawmthu a sawi a. CSR Cell-in hma an lak tirh ata vawiin thlengin Bharat Forge hian an thawhpui tha hle tih sawiin, Mizoramin CSR tam zawk a hmuh theihnana theihtawp chhuah rengtu CII Mizoram chungah pawh lawmthu a sawi.
Bharat Forge Limited vice president, CSR head Dr Leena Deshpande chuan, thingtlang lamah hmalakna an la ngah lutuk lo a. An CSR hi hlawk leh tangkai taka hman an duh a, khuarei daih (sustainable) thil zel tih theih tha an ti tih sawiin, Darzo project pawh hi vawiin amite leh chhuan lo awm zel turte tana tangkai tur project a ni a. Tuihna humhalh leh tihpun lama hmahruaitu tha tak a nih an beisei tih a sawi a ni.
Darzo VCP Lalramchhana pawhin, he hmalakna hian an khua tan khuarei thlenga tangkai tur tuihna tihpunsakin, ramngaw humhalh zel kawngah a pui dawn tih a sawi a. An tu leh fa lo awm zel turte tana project tangkai nia an hriat thu sawiin, sum thawhtu Bharat Forge leh CII chungah an lawm tih a sawi.
Project hawnnaah hian he project kalpui tura inremna thuthlung an inhlan tawn nghal a. CII Foundation leh Darzo VC tangdunin an thawk dawn a ni.
Young Indians Mizoram Chapter hian Mizoram hmasawnna atana pawimawh hrang hrang ngaihtuahin, industry leh tualchhunga an thawhpui dangte nen CSR project dang pawh kalpui tumin hma an la mek bawk.