District tharah hmasawnna kan hmu – Dr R Lalthangliana

Hrilengin a tihbuai karah Mizorama district thar puanah sawrkar hmalakna in hmasawnna hmuh tur a tam tih minister Dr R Lalthangliana chuan a sawi.

South Tuipui bialtu MLA, minister Dr R Lalthangliana hian Inrinni khan Hnahthiala Integrated Industrial Promotion Centre (IIPC) building sak tur hmunhma laih tan chu a enfiah a. Chief minister Pu Zoramthanga kaihhruai sawrkar tharah district thar a function hnu reiloteah department hrang hrang building thar changtlung tak tak hmuh tur awm chu lawmawm a tih thu a sawi.

Hnahthial DC Complex-ah district thar hriatrengna lungphunna tur hmun enin, kumin April-a phun zawh a duh tih a sawi. UD&PA office building sak mek tlawhin thawktute chu tha leh rinawm taka hna thawk turin a fuih.
Hnahthial DC office building thar sak mek tlawhin, kumin August-a zawh hman a duh thu minister hian a sawi a. Strong room pawh kumin inthlana hman theiha peihfel a duh tih thawktute a hrilh. Convention Centre hmunhma laih mek chu en nghalin, thawktute hnenah estimate-ah garage tur ruahman ni lo mah se, Hnahthial district tan rotling tha a nih dawn avangin garage hmunhma tha tak siam turin a hrilh. DRDA office thar tur building sak zawh hnaih pawh a tlawh bawk.