Ebola lengin a vanglai a la thleng lo niin Red Cross-in ngai
Democratic Republic of Congo (DRC) khawchhak lama Ebola leng chuan a vanglai a la thleng lo va, kum khat dang pawh a la awh thei niin Red Cross chuan a sawi.
International Federation of Red Cross & Red Crescent Societies-a operations manager Bruno Michon-a chuan Thawhlehni khan DRC khawchhak lam atanga videolink hmangin thuthar thehdarhtute a kawmnaah, “A vanglai hi kan hnungah ni lovin kan hma lamah a la awm niin ka hria,” a ti.
“Titawp turin kum khat a daih ang tih kan hlau a ni,” a ti a, hripui a darh zau dan chiah chu hriat ‘a harsa hle’ tih a sawi bawk.
Bundibugyo chi, hmuh tur vâng tak leng avang hian tun thlengin DRC-ah mi 192 an thi tawh a. Sorkar chhinchhiah dan chuan thih hnu pawha taksa tuiril chhuak atanga kai theih natna hi province pathum-ah chak takin a darh a ni.
Michon-a chuan Red Cross & Red Crescent team-in khawtlang atanga puitu leh thite him taka phumna kawnga thawktute chu tun hnaiah tawngkam mawi lo taka vau leh beih an tawk tih a sawi.
“Inrintawkna siam tur chuan hun a duh a, rinawmna, dawhtheihna leh inngaihtlawmna a ngai a; mahse, he hri lengah hian duhthlan theih a ni lo va, nunna chhan a ngai a ni,” a ti.
Ram chhunga damdawi in thuneitute chuan hri leng hi thla khat chuang kaltaa puan ni tawh mah se a thlen chin dik tak chu hriat chian a la ni lo niin an sawi.
French tanpuitu pawl, Doctors Without Borders, French tawnga MSF tia hriata Emergency Medical Coordinator Kate White-i chuan Thawhtanni khan, “DRC-a natna hi a zau zawng leh a darh dan dik tak chu tumahin an hre lo,” a ti.
MSF thuchhuah chuan hri kai leh kai lo endik chu ‘hri leng beihnaa chak lohna langsar ber pakhat’ a la ni reng tih a sawi bawk.
Congo-a damdawi in hotu pakhat chuan Reuters news agency a kawmnaah DRC-a harsatna awm chu endikna bak thil dang tam tak a ni tih a sawi.
Thu lakna chi hrang pathum atanga data, laboratory, damdawi in, enkawlna hmun leh hri leng darh dan thlithlaitu team atanga data lak khawm chu a inrem duh mawh hle a, thil dik lo a awm phah nasa tih a sawi.