Ethiopia-a lei lim leh tui lian vangin mi 102 thi tawh
Ethiopia khawthlang lam, Gamo Zone-a ruah sur nasa vanga tui lian leh lei min vangin thi chu mi 102 an tling tawh niin tual chhung thuneituten an sawi.
A tirah chuan thi hi mi 30 vel nia ngaih a ni a, darkar 24 liam ta chhungin a pung zel a. Ningani chawhma lam khan police hotu pakhat chuan mi 64 an thi tih a sawi a, thahnem tak chin hriat loh an la ni bawk.
Thi tam zawk hi hmun sanga khawsate an ni a, ni tam tak ruah nasa tak a sur hnuah an awmna tlang chu a tawlh ta niin thuneituten an sawi.
Ruah sur nasa tak avangin tun hnaiah Africa khawchhak pumah tui lian nasa tak a thleng a. An thenawma Kenya-ah pawh mi tam tak an thi tawh a. Khaw chin zirtute chuan heng lai hmunah hian thli leh ruah na zual zel niin an sawi a, hei hi sik leh sa inthlak danglam vang nia ngaih a ni.
Thi zat sawi thar a nih hma hian South Ethiopia Regional state governor chuan chhiatna tawk chhungte chu a tawrhpui thu a lo sawi tawh.
Tilahun Kebede-a chuan Thawhlehni tlai khan Facebook-ah thuchhuah siamin, “Keimah leh region sorkar aiawhin ruah sur nasa vanga Gamo Zone tlangram hmuna lei min leh tui lian vanga mi 30 an thi hian min tilungchhe hle a ni,” a ti.
Thuneitute chuan chhiatna thlen hnuah hian an chhehvela district-ah ruah a sur chhunzawm zel thu ans awi bawk.
Arba Minch khawpui leh a chhehvelah ni hnih chhung ruah a sur chhunzawm zel a, in, thil dang ding leh lo neihna ramte a tichhe nasa hle.
Thuneitute chuan tui lian leh lei min nasa zawk a la awm theih thu an sawi lawk.
Lei min hian kawngpui pawimawh a tipung a, eng emaw zat tuiin a chim a, hei vang hian mipuite fimkhur turin an ngen a. Emergency team-ten thil awm dan an vil reng bawk.
Kum 20 kalta chhung khan zirchianna tam takah chuan Africa khawchhak pumah khaw awm dan uchuak tak leh khaw ro hun chhung rei tak a pung tih hmuhchhuah a ni.
Scientist-te chuan mihringte vanga boruak inthlak danglamna hian khaw lum leh khaw vawt na tak – ruah sur nasa tak, rei tak awm thei ang chi a tizual a, a tina zual hle niin an lo sawi fo tawh a ni.
July, 2024 khan a thenawm, Geze Gofa Zone-ah lei min vangin mi 229 chuang an thi a, hetah hian chhanchhuak hna thawktute pawh an tel.