Europa League champion Tottenham

Nilai zan khan Bilbao khawpuia San Mamés stadium-ah Europa League final khelh a ni a, inkhel hmuhnawm takah si khat faia Manchester United hnehtu Tottenham Hotspurs chu ropui takin an champion. EPL-ah 17-na daih ni bawk mah se Tottenham hian season tharah Europe a football club te inelna ngaihhlut hlawh ber UEFA Champions League an khel dawn.
Europa League final-a intum Manchester United leh Tottenham te hi EPL-ah 16-na leh 17-naa awm mekte an ni a. Europa League chanchinah final a intum team hnihte an khelhna league-a an hniam ber tum a ni a, final khelh tan a nih hma hauhin a chhe zawngin record an siam nghal. United leh Spurs te hi Europa League-ah an champion a nih loh chuan season thara European competition khel phak lo tur ve ve an ni a, champions league khelh phakna tur a nih vangin an tan final hi a pawimawh leh zual hle.
Final ah hian Tottenham in bul an tan tha a, ball chang tlem zawk ni mah se hlauhawm zawk an ni a, goal thun tumin an khingpuite an nawr na hle. Hlauhawm siam thin mah se a tawp an khar tha lawk thei lova, chawlhlawk dawn hnaihah an hmawr an bawk fuh ta nge nge. Tottenham tan hian Brennan Johnson chuan minute 42-naah vanneihthlak ang reng, fuh ang reng zet siin hmahruaina goal a thun. Johnson goal thun hmang hian 1-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm zui hle a, an si phurh sut tuma United tan khawh a hmuhnawm hle. United hian hun tha nei thin bawk mah se si nghak chetha zet mai Guglielmo Vicario an paltlang thei lova, Vicario an paltlang chhunah pawh Tottenham defender Micky van de Ven chuan goal line atangin a lo petchhuak hman leh hram bawk a, Tottenham trophy chawi hun a inherchhuak tak meuh a ni ber mai. United tan hian Bruno Fernandes, Rasmus Hojlund, Alejandro Garnacho leh Luke Shaw ten goal thun theihna hun tha nei bawk mah se an chhawr tangkai thei lo vek. Hun tawp dawn hnaih an khingpuite nawr buai viau mah se United hi an vanneih ni a ni lova, Europa League final-ah uiawm takin an tlawm zui ta a ni.

Manchester United hnehtu Tottenham hian kum 17 zet hnuah trophy an chawi ve leh ta nge nge a, kum 1984 hnu lamah a vawi khat nan European trophy an lak lehna hmasa ber a ni tel bawk. Tottenham hian season kal mekah United hi an ngam ve reng reng a, Europa League final-a an hneh hi season kal meka vawi li an hnehna a ni hial a ni. English Premier League-ah 17-na dih ni bawk mah se Europa League-ah an champion a, season tharah champions league an khelh dawn bawk vangin lawm vangin an biangah mittui a luang. Player tha leh goal thun thei tak ni chungin South Korea captain Son Hueng-min chu Tottenham tan a rinawm tlat a, club lian zawk zawm theihna hun remchang nei bawk thin mah se a chhuak duh lo. Son hian a rinawm rah a seng a, kum 10 zet hnuah a hmangaih Tottenham chu trophy lian a lakpui a, ropuina ni a nghakchhuak ta nge nge.
Europa League final-ah Tottenham hneh lova an tlawm vangin Manchester United hian season thara European Competion an khel phak dawn lo vek. Kum 1990 hnu lamah United hian European competition an khelh phak loh vawi hnihna chauh a ni a, hei hi team ropui Manchester United tan chanchin lungchhiatthlak tak a ni. Reuben Amorim hnuaiah United in hma an sawn lo viau a, EPL-ah 16-na an ni mek a, kum 1973-74 hnu lama season an hmanchhiat ber tum a ni nghe nghe. Team lian el pha leh turin United hian insiamthat an mamawh hle a, European competion an khelh phak dawn loh vangin player tha lei an harsat dawn thung.