Fair takin hna lak zel a ni ang – K Sapdanga

Mizoram sawrkarin ‘fair’ takin hna a la zel dawn a, political fitness-in kawngro a su dawn lo tih minister K Sapdanga chuan a sawi.
Mizoram Home Guard & Civil Defence lak thar mi 42 te chuan July 24 khan CTI Sesawngah an training zoin thlah an ni a. Hmanpuitu Home minister hian, Mizoram Home Guard chu dinhmun zahawm leh tangkai taka hlankai a ni dawn a, sawrkar hna, a bikin force lam chu dik tak leh thianghlim takin, an tlin dan indawta lak zel a ni dawn tih sawiin, “Home Guard volunteer lak dan leh enkawl dan mumal tak awm thin chu ngaihpawimawh a ni ngai loa, laina leh duhsak zawng inthun khawmna atan hman a lo ni thin. Home Guard lak dan kalphung thar siam a ni a, tun atang chuan HSLC pass chin chauh dil theihin siam a ni a, physical fitness test-in mark a pu anga, tlingte chu uluk takin interview an ni anga, mark hmuh that dan indawn thianghlim takin lak a ni tawh dawn a, polical fitness-in kawngro a su tawh lo ang,” a ti.
Home Guard volunteer post ruak 42 atan diltu 6500 chuang zingah graduate ringawt pawh sang tel an awm tih a sawi a. Kum thum atan lak an ni anga, an nungchang enin thawh chhunzawm a, kum 60 an tlin thlenga pawhsei theih a ni tih a sawi. MRHG Volunteer-te tan an ban huna an chhuahpui tur PE saving scheme duansak an ni, tiin, induhsakna kawngah seniority en vak a ni dawn loa, thuawih thei, mi taima, hotute zahthiam, mahni duty tha taka thawk thei, ruihtheih thil laka fihlimten duhsakna an dawng hmasa dawn tih a sawi a ni.
MRHG basic training nei zo hi mipa 37 leh hmeichhia 5, an vaiin mi 42 an ni a. Passing out parade-ah hian MLA Lt.Col. Clement Lalhmingthanga leh MLA Jeje Lalpekhlua te pawhin an hmanpui.