France squad-ah Kante a kir!
France squad-ah Kante a kir!
Nikuma a Chelsea contract tawp ruala free transfer-a Saudi club Al-Ittihad zawm ta N’Golo Kante chu Euro 2024 khel tur player 25 awmna France squad-ah telh a ni.
World Cup winner Kante hi ram tan kum hnih zet inlan tawh lo mah se Didier Deschamps chuan Euro 2024 khel turin a la ring tawk a, French TV channel TF1 hnenah squad-a a sengluh chhan sawiin, “European league ni lo mah se Saudi Rabia ramah season a khel tluan a, a fitness pawhin ngai awh chho leh tawhin, a tawnhriat zozai hi French team tikhawngtu atan a la pawimawhah ka ngai a ni,” a ti.
Midfielder Kante hi tunah kum 33 mi ni ve tawhin, kum 2018 World Cup-a France an champion tum khan player pawimawh ni mah se June 2022 atang khan ram tan a inlan leh ta lo vang vang a, tunah Europe ramte inelna lianah squad a luahkir leh ta a ni.
Chelsea-a Kante hun tawp lam kha hliamin a bawhbuai a, club lamah Arab team zawm zuiin, ram tana inkhelhna hun nei pha tawh lo hial tura ngaihna a pian hman hnuah France boss Deschamps chuan Germany rama inkhel turin a la ring tawk cheu a, a tawnhriat leh huhang chu national team-in an la mamawh niin a ngai.
Ligue 1 champion Paris St-Germain tana an thawhhlawk avangin rawlthar kum 18 mi lek Warren Zaire-Emery leh kum 21-a upa Bradley Barcola pawh France squad-ah hian telh an ni.
India international pahnih Lallianzuala Chhangte leh Lalengmawia Ralte ang bawkin French rawlthar Zaire-Emery pawh hian football khel chungin lehkha a la zir a; tunhnaia TF1 lamin an kawmnaah kumin Germany ram tournament liana an ram a chamnpion-pui theihna tura a insawrbing theihna’n a final exam hun chu sikul thuneitute’n an sawnhlatsak tih a hrilh.
Zaire-Emery chuan, “Squad-a ka lang ve hi ka hlim takzet a, khawvela tournament ropuiberte zinga mi khela ram ai ka awh thei tur hi ka hlimin ka chhuang takzet a ni.
“Heti a nih avang hian ka exam hun tur pawh kumin favang lam September thlaa min sawnhlatsak turin ka ngen a, football-ah thlamuang takin ka insawrbing thei dawn a ni,” a ti.
Player naupang lam a koh rualin Deschamps hian star forward rualkhat – Kylian Mbappe, Antoine Griezmann leh Olivier Giroud bakah Arsenal defender William Saliba-te pawh Euro 2024 khel turin squad-ah a ko bawk.
Kum 1984 leh 2000 champion France hi kumin Germany ram tournament khelh tura champion beiseiawm zingah telin, a vawithumna atana Europe title hawn thei tur khawpa squad nei tha an ni mek.
June ni 17 khian an match hmasaberah Austria nen Stuttgart khawpuiah an insu dawn a ni.
France Euro 2024 squad
Goalkeepers: Alphonse Areola (West Ham), Mike Maignan (AC Milan), Brice Samba (Lens)
Defenders: Jonathan Clauss (Marseille), Ibrahima Konate (Liverpool), William Saliba (Arsenal), Jules Kounde (Barcelona), Theo Hernandez (AC Milan), Ferland Mendy (Real Madrid), Benjamin Pavard (Bayern Munich), Dayot Upamecano (Bayern Munich)
Midfielders: N’Golo Kante (Al-Ittihad), Eduardo Camavinga (Real Madrid), Adrien Rabiot (Juventus), Antoine Griezmann (Atletico Madrid), Aurelien Tchouameni (Real Madrid), Warren Zaire-Emery (Paris St-Germain), Youssouf Fofana (Monaco)
Forwards: Kylian Mbappe (Paris St-Germain), Bradley Barcola (Paris St-Germain), Ousmane Dembele (Paris St-Germain), Kingsley Coman (Bayern Munich), Marcus Thuram (Inter Milan), Randal Kolo Muani (Paris St-Germain), Olivier Giroud (AC Milan)