Germany an tla ve leh

Australia leh New Zealand-a hmeichhe World Cup khelh mekah group Stage khelh zawh a ni ta a. Argentina, Brazil leh Italy te an tlak hnuin nilaini khan vawi hnih champion Germany an tla zui ve leh.
Group H-a inkhel hnuhnung berah Germany hian chak mamawh chungin South Korea an hmachhawn a, 1-1 a inhnehtawkin an chak zo lo. South Korea lakah an chak zawh loh laia point thum hmu tawh Morocco an chak si vangin Germany hi point li hmu chungin an tla zui ta a ni.
South Korea hian team lian Germany lakah bul an tan tha a, minute rukna lekah Cho So-Hyun-i’n hmahruaina goal a thun nghal. Hma taka si an phurh hi Germny hian minute 42-naah Alexandra Popp goal thun hmangin an sut. Second half-ah chak ngei tuma tan khawhin, khawchhak team nawr nasa viau mah se an vanneih ni a ni lova, goal an thun belh thei lo. Hun tawp thlenga goal an thun belh theih loh vangin World Cup atangin an tla zui ta a ni.
Ningania inkhel dangah Morocco chuan point ruk hmu tawh Colombia chu minute 45+4 a Anissa Lahmari goal thun hmangin an hneh nawlh a, last 16 an inhlangkai.