An rama Pathianni zan, keini tana Thawhtanni tuk khan 65th annual Grammy Awards chu Crypto.com Arena, Los Angeles-ah an sem ta a, Beyonce-i’n record siamin, Grammy history-a award dawng hnem ber a ni ta a, a award dawn tawh zawng zawng hi 32 a tling ta a ni.
-- Advertisement --
Rimawi khawvel tana zan ropui Grammy Awards hi fiamthu thiam Trevor Noah-a’n a host a, Beyonce leh Maverick City Music ten award pali ve ve an dawng a, Brandi Carlile, Kirk Franklin, Kendrick Lamar leh Bonnie Raitt ten award pathum theuh dawngin an dawt.
Beyonce hian a hla ‘Break My Soul’ avangin best dance/electronic recording a dawng a, ‘Plastic Off the Sofa’ avangin best traditional R&B performance a dawng a, ‘Cuff It’ avangin best R&B song a dawn bakah a album ‘Renaissance’ chuan best dance/electronic album a dawng bawk.
Beyonce hian Grammy record a lo siam fo tawh a, 2010 khan zan khat thil thuah Grammy Awards paruk dawngin, hmeichhe zinga hetiang tithei hmasa ber a ni a, 2020-ah a Grammy Award dawn zawng zawng chu 28 tlingin, hmeichhe zinga Grammy Award dawng hnem tawh ber record a siam a, tunah chuan hmeichhia chauh pawh ni lo, mipa zaithiam pawh telin ani aia Grammy dawng hnem an tawh lo. Kumin Grammy-ah hian nomination pakua neiin, heti hian Grammy nomination a neih tawh zawng zawng chu 88 tlingin, Grammy nomination-a lang hnem ber record a nih rual chiah bawk.
A hmaa Grammy Awards dawng hnem ber record siamtu chu classical conductor mual liam tawh Sir Georg Solti niin, ani hian 1963 leh 1998 inkarah Grammy Awards 31 a dawng a ni. Solti hi Hungary a piang niin, 1997 khan kum 84 mi niin a thi a, a thih hnuah 1998 Wagner: Die Meistersinger Von Nurnberg avangin Grammy a dawng leh a, chu chu a award dawn hnuhnung ber a ni ta a ni.
A record siamna award dawng tura dawhsan lam a pan laiin mipuii ding chunga kut bengin an lawmpui a, Beyonce chuan, “Hnuk tih ulh loh hram ka tum a, zanin hian dawn mai ka tum a ni,” tiin a mittui tih tlak loh hram hram a tum a, ” Min vengtu Pathian chungah lawmthu ka sawi. Lalpa ka lawm e. Ka pate Johnny chungah pawh lawmthu ka sawi, kan hnenah a awm tawh lo nain, a thlarauin min awmpui a ni. Ka chhung te- ka pa leh ka nu ten min hmangaih a, min nawr kaltu an nih avangin an chungah lawmthu ka sawi. Ka pasal duhawm tak chungah pawh lawmthu ka sawi, ka fa duhawm tak tak pathum ter, in lam atanga min lo thlirtu te pawh. Mi danglam ho kha lawmthu ka hrilh che u, min hmangaihna leh he genre inhmuh chhuah avangin. Pathianin malsawm che u rawh se. Grammys, ka lawm tak zet a ni,” a ti.
Kumin Grammy-ah hian Lizzo hla hit ‘About Damn Time’ chuan record of the year a dawng a, Big Four category-ah award a dawn vawi khatna a ni a, Bonnie Raitt pawhin a hla ‘Just Like That’ avangin song of the year a dawng a, Big Four category-ah award a dawn tum hnihna niin, Samara Joy pawhin best new artist a dawng a, ani hi jazz artist he award dawng thei pahnihna niin, kum 12 kaltaa dawngtu Esperanza Spalding hnung a rawn zui ve chiah a ni.
Taylor Swift a vannei ziktluak lo a, ‘All Too Well: The Short Film’ chuan best music video a dawng a, he category zaithiamin amah ngawta a direct zinga award dawng thei hmasa ber a ni. Hetihrual hian nomination a neihna song of the year-ah a vannei ta lo hlauh a, he category-ah hian nomination nei chunga award a dawn loh vawi rukna a ni ta.