Grape wine hralh thei ta Winery-ten harsatna tawk

Grape wine hralh thei ta
Winery-ten harsatna tawk
Sawrkarin wine hralh theihna tur dan a duan angin Champhai leh Hnahlan Winery chuan grape wine an siamte an hralh theih lawk loh hnu ah an hralhchhuak thei tawh a. Harsatna erawh an nei nghal ve ve.
The Aizawl Post-in a zawhchiannaah Champhai Tlangsam Winery hian kar kalta lam atang khan an wine -Champwine’ hi an hralh tan a. An beisei ang erawhin vendor lamin an laksak chak loa, grape chingtute grape a baa an lak pawh an la rul hleithei lo.
Thudawn danin, Excise department-in dan anga wine hralh thei tur mi 80 vel an thlang a, dan hnuaia zawrh hmaa grape wine lo zuar hlun zingah thlan ve loh, license nei lo an awm nual. Kum engemawzat wine lei leh hralh lama tawnhriat nei tha, ‘market channel’ hre sa zingah vendor license hmu an awm loh tak nual vang hian a hralhchhuah lam a sak deuh em, tih chu Champhai Grape Growers’ Society lam ngaihdan pakhat a ni.
“Vendor pakhatin tum khatah case 50 vel tal te la tura kan beisei laiin, mi pakhatin case 10 emaw chauh te an la a, a chhuak chak lo hle,” Society general secretary C Zohmingliana chuan a ti a. Nikum lama grape chingtute grape an laksakna man ba pawh an la inpe hleithei lo tih a sawi.
Dan hnuaia wine hralhchhuah chuan an lo kal dan a tibuai rih hle nia a lan thu sawiin, dan hnuaia an hralh hma kha chuan wine bottle-ah hian maximum retail price (MRP) an bel sa ngai loa, a lo hralhtu lam tan an insen zat atanga chhutin a man lo bituk ve leh mai a, tunah chuan dan hnuaiah MRP pawh bituk sa thlapa hralhchhuah a nih tak avang leh, dan hnuaia hralh hmaa Champwine zuar thin zingah vendor license hmu ve lo an awm tak nual avangin, an lo bel tawh sa ‘system’ chu tuna vendor hoin an la kalpui thiam chiah lo em, tih chu an ngaihdan a ni tih a sawi.
Hetihlai hian Champhai Grape Growers’ Society leh Baptist Church of Mizoram inremnaa an wine siam ‘sacramental wine’ atana an lei sak chu tluang taka kalpui a ni tih Society hruaitu hian a sawi.
Hnahlan Winery lam pawhin tunkar atang hian an wine – Isabella’ chu an zuarchhuak tan a. An ni hi an um chah a thlen hleihtheih loh avangin an buai ve thung. Case 200 vel chiah thun sa an nei a, vendor pathum zinga pakhatin case 100, a dang pahnihin case 50 ve ve an order nghal avangin challan tih fel sa order rawn kal pawh an pe hleithei lo maithei tih an sawi. An um chah, 30000 vel hi a thleng a nih erawh chuan kar khat chhung pawhin an wine siamsa hi chu pechhuak zo mai thei turah an inngai tih an sawi a ni. An ni hian grape chingtute grape man ba loin, an laksak laiin an pe nghal thung.
Grape hi July – August chhoa lawh leh mai tawh tur a nih avangin Society pahnihte hian a rang lama tihral an duh hle tih an sawi ve ve a ni.