Group of Twenty (G20) leh Mizoram

Khawvela ram hmasawn tawh (developed country) te, ram thang lai (developing country) te inchawhpawlh, an vaiin ram 19 leh European Union te inzawmkhawmna, Group of Twenty (G20) tia kohte hi chanchinthar lamah ralkhat atangin kan lo hmuin kan lo hmelhriat a. Tunah chuan ralkhat atang mai ni tawh lovin, kan kawtkaiah ngei min rawn luhchilh a, kan lo mikhual ve ta rup mai a, a vanneihthlak tih loh rual a ni awm lo ve.
Chutih rualin kan vanneihpui dan tur chu an cham chhunga an thurel leh an thurel bawhzuina kawnga Mizoram tana hamthatna awm thei tur azir te pawh a ni dawn a. An sawiho tur heng — Urban planning, Infrastructure, Bamboo, Startups, Skill Development, Handloom & Handicraft, Nursing and Paramedics zinga engemaw tal hi chu kan lo hlawkpui ve ngei turah ngai ila.
Mizoramin G20 meeting a thleng hrim hrim pawh hi hma kan sawn phah a, kan hlawkpui nghal der tawh. Kan airport a changkan phah a, an paltlang tur kawngpui leh kawngkam a that phahin a fai vek vuk a. Khawpui chhung a faiin a mawi phah a, palaite mit tikham thei tur nia kan hriat thil tawp leh bawlhhlawh te kan thianfai a, G20 hian meeting hi rawn nei zauh zauh se kan changkan phah ang, tih te chu social media lama comment tam pawl a ni.
Hetih lai hian kawng kama eizawng thin street vendor thenkhat pawh senghawi zingah an tel niawmin Assemby House chhungah hial sawi chhuah a ni a, hetiang thleng thlenga lo inthenfai hi chu a tul chiah em? tih zawhna a awm nghal.
Kan mikhualte hian an lokal hmain kan state dinhmun hi chu an rawn hre chiang sa dawn tih a hriat a. Ram thang mek India rama awm kan ni a, India ramah pawh economic dinhmun hniam tak kan ni tih pawh an rawn hai hauh lovang. Khual thate duhsakna leh, an cham chhunga nuam taka hun an hman theihna tura kan lo inbuatsaihna te pawh an hrethiam em em ang. An lo kal avanga an cham chhunga eizawnna tihtawp sak lailawk an awm tih te phei hi chu hria se, ‘kan lo kal chhan chu in harsatna rawn sutkianpui tur che uin a ni a, harsatna rawn belhchhah tur ni lovin’ an ti ve lawm lawmin a rinawm. Kan nihna ang ang hian lo dawngsawng ila, chu chu anni lam pawhin an duhthusam a nih a rinawm.