Hamilton hmakhalha Monaco hnehtu Antonelli leh bawk!

Formula One season kal laia a zawn zata vawi nga a chak tlinna ni turin Pathianni Monaco Grand Prix-ah Italian rawlthar kum 19 mi lek Kimi Antonelli a chak leh a, Monaco-ah hnehna chang thei driver naupang ber a ni.
Ferrari driver harhtharna rawn chang chho leh mek Lewis Hamilton chu pahnihnaah thlengin, a zawna Grand Prix runner-up tum hnih a nihna a ni ve leh ta a, a lehpekah chuan race winner ni turah beisei teh ang!
Lawmman semna dawhsan hniam ber luahtu chu Red Bull Racing driver Isack Hadjar a ni teh daih thung!
Antonelli Mercedes team-mate George Russell erawh point rut pha lo zawngin 12-naah a thleng ve chauh a, championship standing lamah Italian driver hian fal lehzual zawkin hma a hruai zui ta a ni.
Monaco tlankawngah hian thil thleng a tam a, safety car pawh tum hnih ngawt inlarin, red flag vawi khat vai a ni bawk a; grand prix vawi nga tehreng a chak zawn hnuah Championship leader Kimi Antonelli hian point 66 laiin driver standing-a amah hnaihbertu Briton Hamilton lakah hma a hruaifal ta a ni.
Pathianni race-a Russell hniam em emna chhan chu drive-through penalty avanga pathumna dinhmun a luah laia a hnung bera a tlan a ngaih vang kha niin, Alpine khalhtu Pierre Gasly chuan Briton hremna hmuh hi hlawkpuiin pathumna ni bawk mah se pit lane-a a speed vak avangin hremna a hmu ve leh a, result hnuhnung berah pasarihna a nih a ngai ve ta tho a ni!
Promoted Red Bull driver Isack Hadjar khan final podium position a luahna kawngah palinaa thleng McLaren star Oscar Piastri a hmakhalh chiah chiah.
Race leh race inkar a thui chhoh viau hnuah a zing chho leh tan dawn a, kartawp hian Barcelona-Catalunya Grand Prix thlir tur a awm zui leh dawn a, hei hi kum khat chhunga Spain rama intlansiak vawi hnih awm bik zinga a hmasa zawk tur a ni.