Manipur-a Zo hnahthlakte ralmuang rih

Zo hnahthlak leh Meitei intihbuaina Manipur an
ralmuang rih a, Zo hnahthlakte pawh awm pangngaiin an awm thei rih.

“Tun hnai chawlhkar li vel chu kan ralmuang ta. Ni tin khawsak pawh a pangngaiin a kal a, thil a pangngai rih e,” tiin Zo hnahthlak hruaitu pakhat chuan a sawi.
An ralmuan chhan hi, Meitei lam an chet loh vang a nih thu an sawi a, Zo hnahthlakte hi a che hmasaah an tan ngai loh thu te, Meitei-in an bei a, Zo hnahthlak lamin a inven hna an thawk a, chu chu an buai dan a nih thu leh, Meitei lam an che rih lo a, an chet loh chuan an ralmuang mai tih an sawi.
A hma pawhin chawlhkar hnih chawlhkar thum te an ralmuang tawh thin a, an chawlh vang vang hnua an buai leh chang a lo awm tawh thin. Tunah pawh hian an ralmuang na a, eng chen nge ni ang tih thu chu ngaihtuah tham a awm tih chu an sawi dan a ni.
Zo hnahthlakte ram Churachandpur, Kangpokpi leh Chandel district-ahte inkah bur bur a awm lo a, zirna in pawh an hawng.
Zirna in hi a tam zawk chu an hawng a, raltlante awmna hmun thenkhat an la inkhar tih an sawi. Biak in pawh an hawng a, inkhawm hun pangngaiah an inkhawm thei. Sorkar office pawh an inkhar thuap tawh lo a, engemaw zat chu an inhawng tawh tih an sawi.
An ralmuang na a, khaw hrang hrangah ngawrh takin an la ‘duty’ reng tho. Mahni khua veng turin ‘training’ pawh a kal ngaiin a la kal.