Hmeichhiaten Kuki helin Naga an hrente chhuah phutna lantir
Manipur-a Naga cheng an tamna hmun, Senapati district-a hmeichhiate chuan ni riat liam ta chhunga Kuki ralthuam kengten an man nia sawi mi parukte chhuah phutna an lantir.
Mi chhuah phutna hi Koubru Range Naga Women’s Union, Kanglatongbi CSO leh a chhehvel khuaa Tribal market, New Checkon leh Imphal East-ah mite huaihawt a ni.
‘Silai aiin aw ring zawk rawh se,’ ‘Inruk bona leh tharum thawhna kan duh lo,’ ‘Pawisawi lo nunna humhim ni rawh se,’ ‘Hnam tin tan mihring dikna chanvo hum ni rawh se,’ tih leh ‘Remna leh dikna tan kan ding’ tih ang chi thute chu an au chhuahpui.
Banner-ah chuan, “Naga civil mi pawisawi lote chu Kuki ralthuam keng firfiakten an ru bo,” tih a inziak a. Banner dangah, “Manipur-a Kangpokpi district-a Leilon Vaiphei Kuki khuaah Kuki firfiakten an rukbo, pawisawi lo parukte chu intiamkamna nei lovin chhuah nghal vek kan phut a ni,” tih a inziak bawk.
Naga hnam pawl lian ber, United Naga Council (UNC) chuan mi mante hi him taka chhuah emaw, thah an nih chuan an ruang hlan emaw an phut.
Inruk bo buaina hi May 13 atanga intan a ni a, Kangpokpi leh Noney district-a thil thleng hrang hrang pahnihah mi tu tih hriat lohten kohhran hruaitu pathum telin civil mi pali an that a. Thi zingah hian Thadou Baptist Association hruaitu pathum leh Naga mi pakhat an tel.
He thil thlen hnu hian Manipur Home Minister Govindas Konthujam chuan Kuki leh Naga hnam hniha mite chu an inruksak tawn tih a sawi a. May 15 khan mi 28, hnam hniha mi 14 ve ve chhuahtir an ni.
UNC chuan Naga civil mi paruk (mipa vek) chu ralthuam keng Kuki firfiakten an la man niin an sawi.
“May 13, 2026-a Kotlen leh Kotzim inkara Thadou kohhran hruaitute beihna te, Leilon Vaiphei khuaa Naga civil mi 18 leh Saparmeina-a Salesian pahnih ruk bote hian tumruh taka beihna a ni tih a tichiang a, an thil tihsualte khuh tur leh mipui ngaihvenna tihdanglam nan Naga-ho chu an mawhpuh a, hemi ni vek hian Chiru Naga civil mi pakhat an that bawk,” tiin UNC chuan thu an chhuah.
“An dam a nih chuan intiamkamna nei lo leh tihkhawtlai lova chhuahtir an ngai a, an that tawh a nih chuan an ruang chu an chhungte hnenah hlan nghal tur a ni a, an rinna leh an hnam dan anga Kristian invuina zahawm tak pek an ni ang,” tiin a tar lang bawk.
UNC chhinchhiah danin May 13 khan Kuki khua, Leilon Vaiphei-ah Naga 18 ruk bo an ni a, Sapermeina police station hnuaia Sapermeina khuaah Salesian unau pahnih ruk bo an ni bawk.
Liangmai Naga Council, Manipur-a Liangmai Naga pawlchuan Union Minorities Affairs Minister Kiren Rijiju-a kaltlangin Prime Minister Narendra Modi, Union Home Minister Amit Shah hnenah memorandum an thehlut.
Council chuan memorandum hmang hian Naga ruk boah hian Kuki National Front (KNF-P) pawl an puh a ni. KNF-P hi Suspension of Operations (SoO) inremna hnuaia mi, United People’s Front (UPF) nena inzawm, ralthuam keng pawl an nih thu an tar lang bawk.
Hetih lai hian Kuki pawl lian, Kuki Inpi Manipur (KIM) leh district tina hnam pawl chuan Thawhlehni zanlai atangin total shutdown chu darkar 48 dang atan an pawtsei leh.
KIM chuan Thawhlehnia thuchhuah an siamah ‘thutlukna hi sorkarin a hmaa thil phutte a a ngaihtuah loh bakah hmalakna hmuh tur a awm loh vang’ a nih thu an tar lang.
KIM chuan Naga firfiakten Kuki 14 an la hreng niin an sawi bawk.
Assam Rifle officer pakhat chuan, “Hmun harsa zawkah chhanchhuah leh zawn hna hi thawh mek a ni a, mi mante hi an la dam kan ring,” a ti.
Manipur police chuan, “Kangpokpi district-a Leilon Vaiphei khua, Songtun khua, Khunkho khua leh P. Molding khua vela tlangdungahte chhanchhuah hna thawkin venhim hna thawktuten zawn beihpui an thlak chhunzawm zel,” an ti bawk.