Hnam tana martar-te hi Zofate min phuarkhawmtu – Tawnluia

Hnam chhanna atana martar-te chu Zofate inpumkhatna atan leh inzawmkhawmna atana min phuarkhawmtu pawimawh tak an ni tih deputy chief minister Tawnluia chuan a sawi.
Ex MNA Association huaihawta martar palite ruhro phawrha Martar-te Thlanmuala dah turte thlahna, MNF office-a neih a hmanpuinaah MNF senior vice president ni bawk Tawnluia chuan Zofate inpumkhatna atan leh inzawmkhawmna atana min phuarkhawmtu pawimawh tak chu martar-te an ni, tiin, “Mizoram hi Zofa zawng zawngte tan inpuia pawm a nih theihna’n martar-ten an thawhhlawk hle a. Martar-te inpekna ropui zia leh hlut zia hi kan hre telh telh dawn. An thih chhan kha kawhmawh bawl leh suahsual vang a niloa, ram leh hnam tana nunna hlan an ni. Chawimawi an phu em em a ni,” a ti.
Martar-te Thlanmual chu ram leh hnam tana nunna hlantute, fel taka chhinchhiah leh ngaihhlut a tul tihna avanga din a ni tih a sawi a. Martar-te thlanmualah hian hnam tana nun hlantu zawng zawng dah vek an duh rualin, martar chhungte duhthlannaah an dah a, inphum duhte chu an buaipui zel tih a sawi. Hmun hlu leh pawimawh, historical monument a nih avangin Art & Culture department enkawl atan sawrkarin a dah a; tihchangtlun chhoh zel tum a ni tih a sawi bawk.
MNF chu party dang ang a ni ve loa, mahni pumpui tanghma hai a, nihna um thinte tana din a ni ve lo tih MNF hruaitu hian sawiin, “Hnam tana thisen far tawp thlenga beitute awmna leh dinchhuah a ni. MNF hi tumahin an dah hniam theih miah loh chhan chu, hnam martar-te thisenin a bual a ni a. Martar-te hi kan arsi lian an ni,” a ti.