Home minister-in rel station leh Tlawng lei dawh enfiah

Home minister-in rel station
leh Tlawng lei dawh enfiah
Rel-a Mizorama rawn lut te Sairang Rel Station-a lo dawnsawn dan, station mamawh leh tih changtlun ngai enin Thawhlehni zing khan Home minister K Sapdanga’n a hmunah a tlawh a, Tlawng lei dawh mek pawh enin, a kaihhnawih sawrkar hotuten an tawiawm.
Guwahati leh Aizawl inkar rel-in Sairang Station a thlen hun lai ngeia inner line permit pek chhuah dan leh passenger-te harsatna a hmuna hmuhpui a duh vanga tlawh a ni tih Home minister hian a sawi a. Rela zinte dawl zo tur leh harsatna an neih lohna turin Sairang Rel Station buatsaih a pawimawh tih a sawi.
NF Railways hotute nen an sawiho hnu ah, ILP siam ngai leh tualchhung mi passenger-te chhuahna gate awmkawp chu a hrang ve vea a chhuahna gate ni hnih chhunga siam zo nghal tura tih a ni a. ILP nei lo tlanchhiate pawh umzui an ni a, thawn haw nghal zel an ni tih sawi a ni. ILP hi online portal atanga siam theih ni mah se, passenger tam takin an fill up thiam loh avangin rel chhunga passenger-te awm laia ILP dilna form, hard copy an dah khah theih dan tur ruahman a ni.
“Kan ram dinhmun, kan hnam population enin inthlahdah a thiang loa, khauh lehzuala ILP kenkawh a nih theihnan zirlai pawl, khaw hrang hranga khawtlang hruaitute leh YMA Branch tin kan theihna zawn theuha hma la turin ka ngen a ni,” K Sapdanga hian a ti.
Thutkhawma report danin, rel a lo thlen hian zinmi 250 atanga 300 vel Sairang Rel Station-a chhuk an awm thin a. Transport department ruahmanin Sairang leh Aizawl inkar tlan MST Bus pahnih dah a ni a, chuan man hi mi pakhat tan Rs.80 a ni. Tuna hman mek, online ILP Guidelines Version 2 chu siamthat niin, awlsam zawka dilna buaipui zung zung a nih theihnan Version 3 pawh peihfel tep a ni.
Sairang Rel Station-ah hian zin mite kaihruai a, Mizoram hmun nuam leh tlawh tlak lo kawhhmuh zung zung thei tur Tourist Facilitation Centre ruahman a tul tih sawi a ni bawk.
NF Railways hotute chuan Home minister hi rel terminal sak tum dan an lo hrilhfiah a. Terminal hi kum hnih chhunga sak zawh tura ruahman niin, sak zawh a nih hunah felfai zawka kal theih an inbeisei tih an sawi.
Tlawng lei dawh mek a enfiahnaah PWD hotute leh contractor-ten an lo dawngsawng a. October 22-ah lirthei, LMV leh a hnuailam tan kal theiha hawn tum a ni a; November-ah HMV chin kal theiha peih a nih tur thu Home minister hi an lo hrilh.
Tlawng lei hi tunah a chak zawng enchhin mek a ni a, metric ton 315 dawl zo tura siam niin, leiah hian MT 418-a rit boulder, darkar 24 chhung dah chhin a ni a, 33mm thlenga kul thei tura siam a ni.
Home minister hian lei siam a nih chhunga a helna kawng hlui chhe lutuk chu zin veivak tan zawh a hrehawm hle tih sawiin,October 15 atangin a theih ang anga siamtha nghal turin thawktute a chah.