Hungary-ah Piastri a chak nawlh!

Formula One race a luhchilh hnua a vawikhatna atan McLaren driver Oscar Piastri chuan chequered flag a pel hmasaber ve ta nge nge a, Pathianni Hungarian Grand Prix hnehtu a ni.
Australian driver Piastri hi a team-mate Lando Norris hnung chiahah pahnih atangin a tlanchhuak a, first turn-ah Norris lehpelin hma a hruai tan a; strategic pit stop hnuah Norris chuan a hmahruaina rawn chhunzawm leh zuai mah se tawngkam hriam rawlhna team order hmangin kum 23 mi Piastri chuan a lehpel leh a, tlankawng hmingthang Hungaroring-ah McLaren one-two finish kan hmu zui ta a ni.
Red Bull driver pahnihin podium an lawnkai zawh loh zanah Mercedez driver ropui Lewis Hamilton chuan pathumna dinhmun luahin a career-ah mellung a phun a, a vawi 200-na atan lawmman semna dawhsan a chuangkai tling ta a ni.
Championship leader Max Verstappen a talbuai chhunzawm zel a, Ferrari driver Charles Leclerc hnung chiahah thlengin pangana a ni pha hram a, intlansiak hnuhnung vawithumah hnehna a chang zo ta lo a ni.
Hungary ram intlansiakah hian pathumna dinhmun an inchuh laiin lap 63-naah hmelma hlun pahnih Hamilton leh Verstappen an intawksir a, an insut nat loh avangin an tlan chhunzawm leh thei ve ve a, Hamilton phei chuan mellung phunin podium a luah pha hial a; Red Bull driver erawh panganaah a tlahniam ta duai a ni.
McLaren team order sawi hlawh zui tak kha one-two an beisei vang niin, 2021 Italian Grand Prix hnu lama a vawikhatna atan an driver pahnihin lawmman semna dawhsan sang pahnih an luah phah ta reng a ni.
First corner-ah three-car fight hmuh tur awmin, McLaren driver pahnih Piastri leh Norris inkarah Verstappen a rawn tlazep ve hman a, mahse, Dutch driver hian Hungary tlankawngah pawh season kal laia vawisarih a chak tlin tawh belhchhah turin podium a lawn zo leh ta rih chuang lo a ni.
Verstappen-a hnung chiahah Ferrari khalhtu Carlos Sainz cuan parukna a luah a; Red Bull driver pakhat zawk Sergio Perez leh Mercedes khalhtu George Russell-te’n pasarihna leh pariatna niin an dawt.
RB car khalhtu Yuki Tsunoda leh Aston Martin driver Lance Stroll-te chu points position luahkhattute niin, pakuana leh 10-naah an thleng.