Mithiam ten headphone ngaihthlak nasat lutuk hian beng a tichhet thei niin an sawi tlat mai, fimkhur hle ang che.
Nitin motor khalh paha headphone-a music i ngaithla thin a nih chuan i sim a ngai, i bengdar a tichhe thei tlat mai.
Tunlai iPod leh phone hmangin music kan ngaithla thei tawh a, tunhma zawng aiin headphone pawh kan hmang nasa ta, mahse, i beng tan a tha lo niin Bombay Hospital-a ENT consultant Dr Nishit Shah chuan a sawi a, beng tana him chin leh ngaihthlak dan tur tihian a sawi:
-- Advertisement --
Music chu i ngaihthlak ring zawh poh leh i bengin a tuar a, kan player-a volume an rawn dah sa chanve ai sanga ngaihthlak loh a tha ber, chu pawh kan ngaihthlak rei dan azirin beng tan a la pawi tho. Kan ngaihthlak rei zawng leh a rin zawng hi a pawimawh ber chu a ni.
Bomb puak ri ring lutuk vanga bengngawng ta te an awm a, mahse, headphone vanga bengchhet leh bengngawnna hi chu thawklehkhata awm thut a ni lova, zawi zawiin a rawn thleng thin a, naupang tein i bengchhet mai dawn a ni.
Concert-ah emaw, club-ah emaw kan kal a, pawn kan chhuak chu kan beng a veng hawk a, mahse, ri kan hre tha thei lo thin, kan bengin a chhehvel boruak thar mila insiamremna hun a mamawh thin vang a ni. Chuvangin music ring taka play-na hmun emaw ri bengchheng lutuk awmna hmun atanga vawi lehkhata hmun reh deuh a awm thut te hi beng tan a tha lo thei.
Kan hla ngaihthlak ri dangin min tihbuai kan duh loh vangin headphone hmangin ring tak takin kan ngaithla a, chu chuan kan bengdar a tichhe ta thin a ni.
I ri hriatna i hloh tawh chuan a hma anga tihthat leh ngaihna a awm tawh lo. A tihdamna tha ber chu inven a ni mai. Headphone hmangin rei tak music ngaithla lo la, i ngaihthlak laklawh lai pawhin chawlhsan zeuh zeuh rawh.
I beng lamah harsatna i nei tan deuh ni a i inhriat chuan rang takin ENT doctor pan vat rawh, a lo la nasat loh chuan steroids hmangin siam that leh theih a ni, mahse, chutianga doctor pan vat nachang hria chu tlemte chauh an ni. Hearing aid te a awm a, mahse, heng hi chu beng chhiat tawh hnua hman chauh a ni si.
I player full volume-a minute 5 headphone-a ngaihthlak mai pawh khan ri hriatna hloh hlenna a thlen thei niin mithiam te chuan an sawi. Traffic noise hi 70-80 decibels vela ngaih a ni a, traffic ri bengchhen hliahna tur khawpa headphone-a music i ngaihthlak chuan hlauhawm chhinchhiahna a pel. Nikhatah minute 90 vel, 80% volume-a ngaihthlak hi a him tawkah mithiam te chuan an ngai a, mahse, company hrang hrangah volume hi a inang lo leh tlat bawk si.