IAF kuta airport hlan chak chhan hi chhuitham a tling – MPCC thupuangtu

On Oct 15, 2025 5 0

IAF kuta airport hlan chak
chhan hi chhuitham a tling
– MPCC thupuangtu
ZPM sawrkarin Indian Air Force kuta Lengpui Airport hlan a chak em em chhan chu chhui tham a tling a, chhui ngei pawh a tul dawn tih Congress thupuangtu chuan a sawi.
MPCC chief spokesperson John Siamkunga’n thuthar thehdarhtute hnenah Ministry of Defence kuta Lengpui Airport hlan an chak em em chhan nia lang hi sawiin, The Right to Fair Compensation and Transparency in Land Acquisition, Rehabilitation and Resettlement Act 2013 hmang hian IAF chuan Lengpui Airport ram leh Sihphir ram sq. ft. 5009400 a zau chu compensation hmangin an la a, an lakna zat hi Rs. 1,98, 78,55, 155 a ni tih a sawi.
“He ram, IAF-in compensation hmanga to taka an lak hi, a ram neitu dik takte hnen atangin tu emawin tunhma lam khan a lo lei khawm vek tawh nia sawi a ni a. Tunah hian compensation hmanga tihralna chance a hmu ta nia sawi a ni. A leitu hian a leisaka te hming ho kha, compensation claim-na atan a la hmang zui thei zel hi thil mak tak a ni. IAF kuta Lengpui Airport hlan tum hi Mizoram hmangaih vang ni loin, sawrkarin a enkawl zawh tawh loh vang pawh ni loin, sum duh luat vang a ang ta hle zawk,” a ti.
Union Home minister sawi danin, sawrkar laipui chuan Lengpui Airport hi Airport Authority of India kuta hlan a phal nia a lan laiin, RTI-a an zawhna chhan a nih danin, Mizoram sawrkar atang chuan AAI kuta hlan tura hmalakna mumal ala awm lo nia a lan thu MPCC thupuangtu hian a sawi.
“ZPM sawrkarin AAI enkawl aia IAF hnuaia awm tir a duh zawk tlat hi thil mak sawi hleihtheih loh a ni ber a. Lengpui Airport hi IAF nen kan inphel dawn tih chief minister-in a sawi si a, siamthat theih tawh loh tur, airport tihchhiat vekna tur ruamah kan lut mek a ang ta hle. Airport sir km.1.5-a hlaah IAF-in ram zau tak, compensation hmanga a la fel der tawh nia lang hi a pawi a. Congress party chuan kan pawmzam thei loa, IAF lak tir an nih lohna turin kan bei zel dawn,” a ti.