India-China foreign minister-te inbe mai thei

India-China foreign minister-te inbe mai thei
External Affairs Minister S Jaishankar leh Chinese Foreign Minister Wang Yi te chu Johannesburg-a G20 Foreign Ministers’ Meeting-ah an tel ve ve dawn a, hemi remchang hi chuhin ramria an inmil lohna sawiin an inkawm mai thei.
Tun hnaiah ram pahnihte hi an inmil lohna dah thain kawng dik lam an zawh hret hret a, Line of Actual Control (LAC) hrula Depsang Plains leh Demchok-ah pawh an patrol dun leh tawh a. Foreign minister pahnih inkawmnaah hian ramria inremna kawnga hmasawnna awm mek pawh an sawi dun rin a ni.
October, 2024 atang khan inremna siamin Depsang Plains leh Demchok-ah tangruala hma lak leh an tum a, muanna a awm leh theih nan hian ram sang hotu lian tak tak an inbia a ni.
Tunah chuan inmil lohna hi dah that belh zela ramria an inep zualna lai thina sipai an dahte hnuh kir ve ve theihna tur lam an hawi leh mek a ni.
Tun hnaiah inrem lohna dah that dan tura inbiakna a kal nasa a. National Security Advisor Ajit Doval-a pawhin December khan Beijing a tlawh a, Foreign Secretary Vikram Misri-a’n January khan tlawh lehin hei hian inkungkaihna a titha thar zual a ni.
December, 2024-a Beijing-a Special Representatives (SR) Meeting neih chu kawng dik zawh tanna bul a ni a, lehlam lehlam hian ramri chu muanawm taka siam ve ve an duh tih an sawi ve ve.
Hemi hnuah hian Foreign Secretary Misri-a’n January khan tlawh lehin mipuite pawh intlawhpawh leh theih turin an ti a, Kailash Mansarovar Yatra pawh chhunzawm leh tura tih niin eibar zawnna kawngah pawh thawhhona tha zawk siam zel ni se an ti.
G20 summit neih turah hian India leh China hian inbiak chhunzawm an duh ve ve a ni a, ramria inrem lehzual an duh ve ve nia sawi a ni a. Kuminah hian palai inbiak zela LAC chu muanawm taka a awm theih chu an tum lian ber a ni.