Mizoram lama awm duh chu ration card kan siamsak thei – Supply minister

Tunhnaia Mizoram leh Tripura sawrkar hnuaia ration card nei kawp chu Tripura lama an ration card paihtirin Mizoram lamah ration card hi an siamsak leh mai thei a, tunah pawh manual-in ration card hi siamsak an ni dawn tih Food Civil Supplies & Consumer Affairs minister B Lalchhanzova chuan a sawi.
Thuthar thehdarhtuten an zawhchiannaah minister chuan, Mamit district chhung Zomuantlang Jampui leh Phuldungsei khuaa Mizoram state khua leh tui, an ration card link zui theih loha awm mek chu Mizoram sawrkar chuan a ngaipawimawh hle a, heng zingah hian chhungkaw 50 leh chhungkaw pum ni lo mi 35, an vaiin mi 85 an ni tih a sawi.
Heng mite hi Ration Card Management System (RCMS) portal-in hmun hniha ration card neih a phal loh avanga a lo reject, system-in Mizoram lama awm tura a lo pawm theih loh an ni a. Mizoram sawrkar chuan kan mi leh sa an nih avangin manual-in ration card a siamsak dawn a. Mizoram lama awm nghet tur erawh chuan Tripura-a an ration card atang hian an inpaih tir a ngai dawn tih a sawi a ni.
“A hma chuan ramri bulhnaia awm thenkhat hian state pahnihah ration card mai ni lo, voter ID leh Aadhaar pawh an nei kawp thei a; ration card bikah Tripura aiin Mizoram sawrkarin ration card nei double a zawnchhuah chak zawk avangin, tuna kan hmanraw hman – RCMS database hian ration card nei kawp a zawnchhuah zel avangin Tripura-a aadhaar link telte kha Mizoram database-in a chhinchhiah thei ta loa, he thil hi a lo thleng ta a ni,” B Lalchhanzova hian a ti.
FCS&CA chauh ni lo, Mizoram sawrkar department dang hmalaknaah ramria awm kan state mi leh sate sawrkarin a ngaihsakin a tuamhlawm zel dawn tih a sawi bawk.
Zawhna chhangin FCS&CA hotute chuan, heng khua amite hian Mizoram sawrkar hnuaia awm nge Tripura sawrkar hnuaia awm an duh zawk tih an la zawt loa; ration buhfai bikah erawh Mizoram lamah chuan card var hnuaiah awmin, Tripura lamah chuan a NFSA hnuaiah awmin thlawnin buhfai an dawng thung tih an sawi. Tripura lam hian an ration card hi paihsak duh lo ta se, anni’n inpaih tir an duh si chuan state sawrkar level atanga dil pui theih a nih a rinawm tih an sawi a ni.
Minister chuan ramri hrula awmte tan hamthatna awm thei scheme an la nei loa, ngaihtuahnaah a awm a ngai dawn tih a sawi.