India-in indona avangin Bukavu-a a mite chhuak turin ti

India-in indona avangin Bukavu-a a mite chhuak turin ti
India chuan Pathianni khan Bukavu, Congo-a a ram mi awmte chu Rwanda-in a puih M23 helhovin an hnaih zel avangin ‘an theih ang angin’ chhuahsan turin a hriattir.
UN thuneitute chuan kar hmasa khan M23 leh Rwandan sipaite chu Bukavu hmar lam km 60 leka hlaah awm tawhin khawpui hi an pan mek tih an sawi a. Helho hian kar hmasa khan khawchhak lama Goma khawpui an lo la fel tawh a, inbeihnaah mi 770 chuang an thi.
Kinshasa-a Indian embassy chuan Pathianni kha chuan M23 hi Bakavu atanga km 20/25 vel chauhvah an awm tawh tih a puang leh.
“Himna dinhmun thlirin Bukavu-a Indian chengte chu a rang thei ang berin mahni remchan dan anga chhuak tura tih an ni a, tunah hian thlawhna tumhmun, ramri leh sumdawnna kawngpuite pawh a la inhawng a ni,” tiin hriattirna chhuah a ni.
“Bukavu pana zin chi a ni rih lo bawk,” an ti.
Indian embassy hian Congo khawchhak lama thil thlengte chu an ngaihven reng tih an sawi a, Indian-te chu ‘inringa rikruma chet dan tur inruahman turin’ an ti tih an sawi.
Embassy hian Indian-te chu an nihna tilang thei thil leh zin veivaha tul lehkha pawh inring reng turin an ti a, mamawh zualpui – damdawi, thawmhnaw, ei mai theih thil, tui te ipa dah reng turin an ti bawk.
Tual chhunga chanchin thar puante ngaihven tur te, punkhawmnaa tel l tur te, lungawi lohna lantirnaa tel lo tur leh langsara khawsa lo turin tih an ni.
Zirtawpni khan India hian Congo-a indona awm mek chu inbiakna hmanga chin fel ni se a duh thu a lo sawi tawh a, Goma khawpuia Indian cheng 1,000 zinga a tam zawk chu hmun himah an insawn fel tawh.
External affairs ministry thupuangtu, Randhir Jaiswal chuan Congo-a himna derthawng ta chu India-in pawi a ti hle tih a sawi a. “Muanawm taka ching fel turin a duh a ni,” a ti.
Tun tuma buaina a chhuah hma hian Congo-ah hian Indian 10,000 chuang an awm thin a. Indan sipai 1,200 vel chu UN Mission in the Democratic Republic of Congo (MONUSCO)-ah an awm a, an ram khawchhak lama inkulh an ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More