India leilungah Chopra ropui leh nghal

Kum thum chhung zet India leilunga intihsiak a hmachhawn tawh loh hnuah Nilaini khan Olympic feikhawh champion Neeraj Chopra chuan Bhubaneswar khuaah Federation Cup khelin gold medal a hlawhchhuak zui leh nghal zat.
India a luh hma chiahin Doha Diamond League-ah kum 26 mi hian silver awrhin, Arab ram atangin India a thlawklut a, Federation Cup fourth round-ah 82.27m khawhin hma a hruai a, round ngana leh round rukna khawh zui tawh lo mah se final round thlenga khawh chunga silver medal awrhtu DP Manu aiin a sang zawk ta tho a ni.
He Cup-ah hian Chopra hi Haryana hmingin a chhuak a; silver medal dawngtu Manu of Karnataka hian metre 82.06 khawh thlengin, pathumna Uttam Balasaheb Patil of Maharashtra chuan 78.39m-a thui a khawh ve bawk.
Tualchhung tlangval leh Asian Games silver medallist ni bawk Kishore Jena (75.49m) a chetha lo a, pangana daih niin, Paris Olympics-ah erawh a inlan thei dawn a, nikum khan Hangzhou, China-a Asian Games silver medal a awrhna kawngah 87.54m a khawh thlen avangin kumin Olympic-ah India tan a inlan thei dawn a ni.
India rama Chopra inelna hmachhawn hnuhnun ber chu March 2021 daih tawh kha niin, kha mi tum khan 87.80m khawhin medal tho a awrh a, tuntum hian a inlan hnuhnun ber tum kha a pha lo hle a ni.
Kha mi hnu khan Chopra hi sang takah a invawrh zui a, Tokyo Olympics-ah gold hlawhchhuakin, 2022 Diamond League champion a nih bakah 2023 world champion a ni zui leh a; China ramah Asian Games gold a humhim zui leh bawk.
2022 World Championships-ah pawh silver medal a lo hlawhchhuak tawh a; a khawh thui ber 89.94m chu men’s javelin national record ding lai ni mah se a career-ah metre 90 a la khawh thleng thei tlat lo a, chu mi chungchang chu chhuak hmasa lamah tarlan a ni tawh nghe nghe.
He champion athlete hian kan hma lawka Paris Games-ah hian Olympic gold a kawl lai humhim a tum zui leh dawn a, chu mi atan chuan ngawrh takin inbuatsaihna a kalpui mek a, Paris-a India gold medal beiseina lian pakhat a ni.
Kalinga Stadium-a Federation Cup hmeichhe 100m intlansiakah Karnataka nula SS Sneha chu tlan chak ber niin, 11.63 seconds nen 100m gold a awrh a; Giridhrani Ravi of Tamil Nadu (11.67) leh Srabani Nanda (11.76) of -te’n lawmman semna dawhsan hniam zawk pahnih an luah ve bawk.
Mipa lama tlan chak ber chu Gurindervir Singh of Punjab (10.35 seconds) niin, 200m gold latu Odisha aiawh Animesh Kujur (10.50) chu 100m intlansiaka Gurindervir Singh dawttu a ni a, bronze medal latu chu Punjab athlete dang Harjit Singh (10.56) a ni.
Men’s javelin throw bakah men’s triple jump chu ram chhunga athlete tha ber berte inlan kim thaw thangna dang niin, national record holder Praveen Chitravel of Tamil Nadu (16.79m) chuan beisei pha lo mah se gold a hlawhchhuak zui ta tho a; reigning Commonwealth Games champion Eldhose Paul of Kerala (16.59m) chu pahnihna a ni.