Indian Ocean-ah MH370 thlawhna zawng tha leh dawn

Indian Ocean-ah MH370 thlawhna zawng tha leh dawn
Malaysian cabinet chuan kum 10 chuang hnuah Malaysia Airlines flight MH370 bo zawn hna thar thawh leh turin a ti.
Tun tuma zawn leh turah hian Indian Ocean chhim lama km 15,000 tuam a ni dawn a, exploration firm Ocean Infinity-in an zawnna turah hian ‘hmuh loh chuan man pek loh’ tur a ni.
Company hian an hmuh chuan $ maktaduai 70 an dawng dawn tih Transport Minister Loke Siew Fook chuan a puang.
Flight MH370 hi kum 2014 khan mi 239 phur chungin Kuala Lumpur atanga Beijing a pan chu a bo va. Thlawhnaa thil thlengah chuan a mak ber pawl niin a chuang chhungte tam takin zawn that leh hi an duh.
A bo atanga kum eng emaw zat chu nasa taka zawn a ni a; mahse, a keh them pawh hmuh a ni lo va. A hmaa zawnnaah hian ram hrang hrang thawk chhuakin $ maktaduai 150 sen a ni a, kum 2017 khan tawpsan a ni.
Sorkar pathum – Malaysia, Australia leh China chuan a zawn hna hi thlawhna awmna ‘finfiahna chiang’ a awm chauhvin an chhunzawm tawh dawn tih an sawi.
Kum 2018 khan Ocean Infinity hian tuna an zawnna inremna ang tho hian an lo bei tawh a, thla thum chhungin an hlawhchham.
December khan Malaysian sorkar hian zawn leh dilna chu a thupungin a pawm a. Sum leh pai lama inremna erawh March thla hma zawng neih a ni lo.
Nilaini khan Malaysia hian pawmin zawn a ni leh dawn ta a ni.
Loke chuan, “Sorkarin a zawn chhunzawm leh dawn a, MH370-a chuang chhungte pawh chanchin hrilh zel a ni ang,” a ti.
Flight MH370 hi Kuala Lumpur atangin March 8, 2014 hma tak khan a chhuak . Darkar khat pawh tling lovah air traffic control nen an inbe thei lo va, radar atang chuan a thlawhna tur kawng lo lam a pan tih a lang.
Chhuitute chuan Indian Ocean chhim lam khawiah emaw a tla a nih an ring a, tun thlengin thil chiang erawh a la awm lo.
He thlawhna keh them ni ngeia rin eng emaw zat chu Indian Ocean kamah a len chhuak nual tawh.
Thlawhna ho hian rin dan hrang hrang a siam a. Thenkhat chuan a khalhtu hian a tlak luihpui niin an ring a, ram dang sipai kah thlak nia ring pawh an awm.
Kum 2018-a chhuinaah chuan thlawhna hi mi dangin an thunun niin an hria a, finfiahna erawh a awm lo va. ‘Thlawhna hmuh a nih hnuah chauh a chhanna chu a awm ang’ tiin chhuitute pawhin an sawi.
A chuang hmun thuma hnena hmun hnih chu Chinese an ni a, Malaysian 38 leh Australia, Indonesia, India, France, Ukraine, US leh ram dang tam tak an tel.
December thlaa zawn a ni leh dawn tih thu a awm atangin a chuang chhungte ngaihdan a inang lo nual a. Thenkhatin tha an tih laiin thenkhat chuan rilru a na thar leh mai mai tia sawi an awm.