Indian state hausa berah tawng avanga inhnialna thleng nasa

Indian state hausa berah tawng avanga inhnialna thleng nasa
Chawlhkar eng emaw zat chu India-a state hausa ber, Maharashtra-ah tawng leh nihna chungchangah inhnialna a awm ta.
April thlaa Maharashtra sorkarin sorkar primary school-ah Hindi chu tawng pathumna atana zir vek tura a tih atangin inhnialna hi a awm tan a. Hindi hi saptawng leh an state-a an hman ber, Marathi dawta hman tura an tih a ni.
Naupangte tawng pathum zirtir tura tih hi sorkar laipuiin a ruahman anga tih a ni.
India-ah hian kum 1968 atangin National Education Policy (NEP) hman tan niin a tum ber chu zirna tihchangtlun a ni a, sorkarin a ennawn reng bawk.
Policy ennawn hnuhnung ber, Prime Minister Narendra Modi-a sorkarin kum nga kal taa a tihah khan thawh hrang hranga hmalak dan tur a ruahman a, hei hian a hma atangin sawisel a lo hlawh tawh thin.
Maharashtra sorkarin thuthlukna a siam pawh hi mipui pawl, language activist leh eptu party hruaituten an duh lo hle a; hmar leh ram lailia an hman nasat, Hindi chawk luh tumnaah an ngai.
Tawng hi Indian state tam takah sawi hlawh tak a ni reng a. Tual chhung tawng bil a tamin hei hian a hmangtute nihna pawh thui tak a keng a, tihdanglam emaw, tawng danga pawlh tumna emaw a awm hian sawiselna a nasa thin hle.
Nikum maiah pawh khan Bengaluru-ah Kannada language activist-te chuan India-a Silicon Valley an tihah hian khawlaia thil tar (billboard)-ah saptawng ni lovin, tualzal tawnga ziah phutna an lo huaihawt tawh.
Hindi hi India-a hmangtu tam ber an ni a. Kum tam tak chu sorkar laipuiin chawi lar tumin a bei tawh a, hei hian an hman ve lohna state-a nunphung a tihchhiat hlauhna a awm thin.
Hindi hmang tamna, hmun changkang si lo atangin hman ve lohna, chhim lam state-ah hna zawngin mi an lut nasa a, hei hian tawng tihdal hlauhna a siam nasa.
Political analyst Abhay Deshpande-a chuan Hindi-in tawng dang a pawlh dal hlauhna hi Hindu nationalist BJP-in kum 2014-a ro an rel atang khan a nasa zual niin a sawi a. BJP hi Hindi hmanna state-ah an lian zual a, an hruaitute hian Hindi chawi lar tumin an bei nasa bawk a, sawi pawh an hlawh thin hle a ni.
Maharashtra-ah hian mipui atanga duh lohna a nasat em avangin BJP kaihhruai tangrual sorkar chuan tawng chi thum zir tur a tihna chu a sut leh rih a. Committee dinin three-language policy zirna kalpui dan tur ennawn turin a ti a; mahse, a hmaa kalpui a lo tum tawhna avangin sawisel a a hlawh tho.
India-a state hausa berah hian munical council hausa ber, Mumbai khawpui telin tual chhung rorel khawl, municipal inthlan a awm dawn a, state sorkar policy chu politics-a inbeih nan la lutin boruak a vung zual.
Rorel lai tangrual leh eptute an inbei nasa a, politics khelh nana tawng hmangah an inpuh ve ve.
Indian state hausa bera tuallai tawng humhalh duh luat avang hian Marathi hmang lote laka tharum thawhna pawh a thleng ta zeuh zeuh va. April thla khan Thane district-ah hmeichhe pahnih chu an chenna hmunah mipa pakhatin Marathi tawnga a biakna an hre thiam lovin ‘excuse me’ tia an biak letna avangin kut an tuar nia sawi a ni.
Hemi thla vek hian Mumbai-a security guard chu ram mi nihna la vawng tak, eptu, Maharashtra Navnirman Sena (MNS) party worker-ten Marathi a hre lo nia puhin kut an lo thlak tawh bawk.
May thla khan Mumbai-a nupa tuak chuan an thil chah dahtu (delivery agent)-in Marathi a hman duh loh avangin pawisa an pe duh lo va. Kar hmasa khan social media-a video darh pakhatah dawr neitu pakhat chu MNS worker-ten Marathi a hman loh avanga kut an thlak lai a lang bawk.
Hetih lai hian tual chhung tawng humhalh duh luat avanga inpawh phah ta pawh an awm a. Kum tam tak kal tawha an inthen hnua politics-a na taka inep zui ta political party pahnih chu thukhat vuain an tang dun mek.
Kar hmasa khan kum 1960 chho vela Maharashtra-a ram leilung fa leh nihna humhalh tuma nasa taka beih avanga lar, Hindu nationalist party Shiv Sena dintu, Bal Thackeray-a fapa, an state-a eptu ni mek, Shiv Sena (UBT) party chief Uddhav Thackeray leh Bal Thackeray-a unau fa, Raj Thackeray-a kaihhruai MNS chuan Maharashtra-a Hindi seng luh tum duh lohna kawng zawh an huaihawt dun.
Unau hnihin hetianga hma an lakna hi mi thiamte chuan ‘Marathi vawn’ duhna rilru atanga tih ni mah se a phenah municipal inthlan chu a awm thu an sawi a, an dinhmun pawh a that phah an ring bawk.
“Marathi tawng leh nunphung hi mipuite thinlung nen inhne hnai tak a ni,” tiin political journalist thin, kum 20 chuang an state-a thil thleng hrang hrang lo ziak tawh thin, Prashant Dixit-a chuan a sawi a. “An thiltih hi mipuite thinlung dek tak a ni dawn a, a bikin Mumbai-a chengte zingah a thawk na zual dawn a ni,” a ti.