Mualthuam ‘N’ telirawl bo thiin hmu

Lunglei district Mualthuam ‘N’ mi, August 3 zan atanga a chin hriat loh chu August 5 chawhma lam khan an khaw middle school bulah a ruang hmuh a ni. Amah hi Mualthuan North High School-a pawl 10 zirlai a ni.
Thudawn danin, Mualthuam ‘N’ tleirawl H Ramdinpuii (15) d/o H Lalawmpuia chu tunkar Thawhtanni zan dar 8.30 vela a chhuak chu a chin hriat zui a ni loa, hemi zan hian chhungkua in zawngin a tuk Thawhlehni ah khawtlang hruaitute hriattir an ni a, khawtlangin an zawng zui a ni.
Hetianga an zawn mek lai hian Nilaini chawhma dar 10.30 vel khan Mualthuam ‘N’ Middle School bul hnimbuk karah a ruang hmuh a ni a, a bo laia a thuam inbel ang a lo la inbel a, a taksaah hriamhrei sulhnu hmuh niin, a dul, a nak leh a hnungah thilzuma vihna nia lang hmuh a nih bakah a nghawngah thil hriam hmanga zaina a awm tih sawi a ni bawk.
Thudawnna sawi danin, khawtlangin an lo zawn tawhnaah tuna a ruang an hmuhna pawh hi zawn tel a ni a, chutiang hmuh a ni lo. August 4 leh 5 pawh hian middle school hi an kal a, chutiang hmuh a awm lo. Nilaini chawhma hian a ruang hi hmuh a ni ta a, a ruang an hmuhnaah hian thisen chhuak hnuhma hmuh tur a awm lo nia sawi a ni.
Lunglei Police pawh Nilaini chawhnu lamah Mualthuam ‘N’ hi thlengin tih tur tul an ti a, hnu chhui hna pawh thawh zui nghal a ni.
MZP Hqrs. Lunglei chuan thuchhuah siamin, an zirlai pui chunga hetianga thihna a thleng chu hriatthiam har an ti a, Lunglei district huamchhunga zirna in zawng zawngah H Ramdinpuii sunna hun hmang theuh turin a ngen tih a sawi.
MZP Gen. Hqrs pawhin, Mualthuam ‘N’ a an zirlaipui thia hmuh a ni chu pawi an tih thu sawiin, an zirlaipui laka hetiang thil thleng hi an enliam mai mai dawn loa, dan leh thupek kengkawhtuten uluk taka chhui a, pawikhawihtu zawng chhuak tur leh, a na thei ang bera hremna pe turin a phut tih a sawi.
A ruang hi vawiin, August 6 hian Lungleiah post mortem a ni ang.