Iran kah hnuah US khawpuite an inralring nasa

Iran kah hnuah US khawpuite an inralring nasa
President Donald Trump-a’n Iran a beih thut hnuah US-a khawpui lian hrang hrangah venhimna tihkhauh nghal a ni a. Israel leh Tehran inkara indona chhuak meka Washington inrawlhna hi chhan let ngei a nih rinna a lian hle bawk.
Pathianni tuk hma takah khan Pentagon-in ‘Operation Midnight Hammer’ tia a hming a vuah hmangin US sipaite chuan Iran-a nuclear hmun pathum a kap a. Tehran chuan Israel nen an indonaa US inrawlhna hian ‘kumkhaw daih tur nghawng’ a neih thu leh chhan letna tur ‘kawng hrang hrang dap’ a nih thu a sawi.
New York, Washington, DC leh Los Angeles-ah chuan sakhaw hmun, palai awmna hmun leh vantlang hmunah chuan vengtute an patrol nasa zual nghal a. Thuneitute chuan tun thleng hi chuan hlauhawm a awm loh thu leh fimkhurna thila tih mai chauh a nih thu an sawi.
An khawpui berah chuan Metropolitan Police Department chuan Iran-a thil thlengte an vil reng tih sawiin tual chhung, state leh sorkar laipuia dan kengkawngtute nen tanghovin thil pawimawh an inhrilh zel tih an sawi.
New York Police Department chuan khawpui chhungah officer an tirh chhuah tam zual thu leh US Department of Homeland Security leh sorkar laipui hnuaia agency dangte nen hlauhawm awm thei an thlithlai uluk hle tih an sawi.
Khawpui chhunga sakhaw hmun, hnam hmun leh palaite awmna lai bawr chu an en uluk zual a. Greater New York huam chhung hi Israel pawn lama Juda tamna lai ber niin maktaduai 1.4 chuang an awm a ni.
Kum 2001 atang khan NYPD leh an thawhpui sorkar laipui hnuaia mite chuan khawpui beih tumna vawi 30 chuang an titlawlh tawh tih department chuan a sawi a. Thuneitute chuan intelligence thil reng reng, ram danga an thawhpui leh rikruma che chhuak chi te nena an ngaihven reng a, US-in Iran a beih atangin eng emaw palh awm thei reng reng hmaih an tum lo tih an sawi.
NYPD hnuaia Intelligence Bureau chuan international liaison program kalpuiin ram 13-ah mihring an dah a, an dahnaah hian Israel pawh a tel a. Heng mite hnen atang hian thil pawimawh an hriat rualin an hmunpuiah an hlan chhawng nghal zel a ni.
NYPD hian khawl hmanga Sensitive Compartmented Information Facility an nei bawk a, hei hi khawl hmanga thil ngaihthlak theih miah lohva thutkhawmna hmun a ni a. DHS intelligence analyst pathum dah bawkin anni hian thu an dawn reng reng lo thliara hlauhawm tling thei nia ngaihte a buaipuite hnena thlen zung zung thei tur an ni.
Heng bakah hian foreign linguist program pawh kalpuiin hei hi speaker 1,200 chuang hmanga tawng chi 85 hriat theihna a ni a. Microsoft nena thawkhovin Domain Awareness System an nei bawk a, hei hi thil thlen lai la laa thil thleng hriat theihna a ni.
Los Angeles Mayor Karen Bass-i pawhin US khawpui lian ber pahnihnaah hian thil thleng an thlithlai uluk hle tih a sawi a. “LAPD chu sakhaw hmun, hnam thil tihkhawm tamna leh hmun pawimawh zual bik hnaihah an patrol nasa lehzual,” a ti a. “Kan inralring reng dawn,” a ti bawk.