Israel-in Gaza a beih vangin mi 27 thi

Central Gaza a raltlante awmkhawmna UN school chu Israeli air strike-in a fuh avangin a tlem berah mi 27 in nunna an chan niin local officials te chuan an sawi.
Israeli military te chuan “Hamas compound” siamna UN school chu a beih ngei a nih thu a sawi zui bawk.
Local journalist te chuan Israeli warplane te chuan Nuseirat refugee camp a UN school chhawng chung bera classroom chu missile pahnihin an kap tiin an tarlang.
Hamas media office chuan Israel chu ‘suatna rapthlak’ kalpui tiin a sawisel nghal a. “Indona hi tawp rawh se. |um tam in leh lo tlanchhiatsanin kan awm tawh a. An mut laiin kan fate tihhlumin an awm” tiin he thila hliam tuar hmeichhe pakhat chuan a sawi.
Ismail al-Thawabta, director of the Hamas media office chuan Israel-in UN school-ah Hamas command post dah ruk nia a sawi chu a hnawl a. Israel hian pawi a khawih nasa taka a thiam chan nan thu a phuahchawp thin tiin a sawi.
Israel Defense Forces (IDF) te chuan thuchhuah an siamah ‘Nuseirat a Unrwa school a Hamas compound chu fuh taka kahin a awm’ an ti ve thung.
Israel chuan Hamas leh Islamic Jihad terrorists te 7 October a southern Israel runa mi 1,200 vel tihluma lung in tang tura mi 251 la tute lakah phuba lakna an kalpui zel a ti bawk.
Gaza indona avang hian nunna chân 36,580 chuang an awm tawh niin Hamas-run health ministry chuan a tarlang a.
IDF te chuan air strike an neih hma in civilian tena an tawrhloh theih ang ber turin fimkhur takin ruahmanna an siam lawk hmasa thin tiin a sawi bawk.
A hma lawkin Israeli military te chuan central Gaza a Deir al-Balah khuaa Bureij refugee camp khawchhak lam chu an thunun tawh thu sawiin Palestinians eng emaw zahin nunna an chan nia sawi a ni bawk.
Israel chet lakna avangin bomb hman nasat hle niin charity pawl Medicins Sans Frontieres (MSF) te chuan ruang 70 vel zet a tam ber hmeichhia leh naupang te chu thawhlehni atang khan an damdawi in siam chawpah thlen an ni tawh tiin an sawi.