Israel-in Gaza a beihnaah Al Jazeera-a thawk thi tel

Gaza-a Israel beihpui thlaknaah hian mi paruk an thi a, Al Jazeera cameraman pakhat leh naupang pakhat an tel niin damdawi in thuneitu leh chhanchhuaktuten an sawi.
Al Jazeera chuan Inrinnia Gaza lailia chenna in pakhat beihnaa an correspondent Ahmed Wishah-a thihna chu ‘mi thah tumna thil sual tenawm tak’ tiin an an dem thu a sawi.
Israel Defence Forces (IDF) chuan Wishah-a hi ‘Hamas military wing-a firfiak, sniper operative hna thawk’ niin an sawi ve thung.
Gaza-a Hamas enkawl health ministry, UN-in an chhinchhiah dan rintlaka a ngaih chuan nikum October thlaa Israel leh Hamas inkahhai kalpui atangin Israeli sipaite chuan mi 1,007 an that tawh niin a sawi.
Al Jazeera chuan Wishah-a thihna hi khawvel dan leh hram zam bawhchhiatna leh langsar tak a nih thu a sawi.
IDF chuan tun hnai thla eng emaw zat chhung khan Wishah-a hian Israeli sipaite ralsai hmanga beih tumnaah a lo inrawlh tawh tih an sawi a, finfiahna erawh an sawi lo.
Bureij refugee camp-a chenna in beihpui thlaknaah hian Wishah-a rualin mi dang pahnih an thi tih tual chhung damdawiin leh chhanchhuah hna thawktu, Hamas-in a enkawl civil defence agency chuan a sawi a. IDF chuan mi dang pahnih thahte pawh hi Hamas-a tel niin an puh bawk.
Wishah-a unaupa, Mohamed-a pawh Al Jazeera-a correspondent a ni a, April thla khan Israel-in beihpui an thlaknaah a lo thi tawh a. IDF chuan Hamas rocket leh ralthuam siamna hmunpuia hna thawkah an puh a, thu chiang erawh tar lan a ni lo.
Hetihlai hian Gaza City-a Sabra vengah chuan zan khuaa chenna in pakhat beihnaah chhungkaw member pali an thi niin civil defence, an chhungte leh a bula damdawi in chuan an sawi.
Shifa Hospital chuan an chhungkaw ruang hi an dawng tawh tih news agency-te an hrilh a, naupang pahnih an tel a. Damdawi thiamte chuan Reuters hnenah thi zingah hian hmeichhe pahnih leh naupang pakhat an tel tih an sawi.
Gaza chhim leh hmar lamah pawh beihpui thlak a ni.
Israel leh Palestinian silai keng pawl, Hamas pahnih hian October thla atanga inkahhai bawhchhiaah an inpuh tawh reng.
Inremna ang chuan Gaza-ah mihring puihna tam zawk luhtir tur a ni a, UN chuan in 81% vel a chhia niin a sawi a, tanpuitu pawlte chuan puihna tam zawk a ngai niin an sawi bawk.
UN-a humanitarian agency hotu, Tom Fletcher-a chuan kar kal taa UN Security Council-ah inkahhai atangin truck tam zawk an luh avangin ei tur tlachham chhungkaw zat chu 92% atangin 36%-ah a tlahniam tih a sawi a, mi cheng 70% chuan chenna tur mumal an la mamawh tih a sawi bawk.
Inkahhai puan rualin Hamas-te pawhin ralthuam an dah a ngai a, Gaza rorelnaa inrawlh lo tur an ni bawk a, hei hi tihhlawhtlin a la ni lo.
Israel leh Hamas indona hi Hamas kaihhruai fighter-ten October 7, 2023-a Israel chhim lam beiha mi 1,200 vel an thah leh hren tura mi 251 an hruai atanga intan a ni a. Hemi hnua Gaza-ah hian Israeli sipaite beihpui an thlaknaah mi 73,000 chuang an thi tawh a ni.