Israel-in Hamas a run dawn tho tho – Netanyahu

Prime Minister Benjamin Netanyahu chuan Israel chuan southern Gaza city Rafah chu Hamas te nena inremna zawnga inbiakna an nei emaw nei lo emaw an run dawn tho tho tiin a sawi.
Hetih lai hian inkahhai awm theih nan leh lung in tang te chhuah zalen a nih theih nana hmalakna kalpui mek a ni thung a.
Mahse mitang chhungte nena inkawmna an neihnaah Netanyahu chuan inremna an siam emaw siam lo emaw Rafah chu a run dawn tho tur thu a sawi a ni.
Pathianni khan US President Joe Biden chuan Netanyahu nena inbiakna an neihah Rafah chungchanga White House dinna chiang takin a hrilh nawn a. A hma pawhin Biden chuan Rafah run chu ‘red line’ a ni ang a lo ti tawh.
Thawhlehni khan UN Secretary General Antonio Guterres chuan Rafah in beih a tawk a nih chuan a nghawng a turu lutuk dawn tia sawiin Israel nawr thei tinte chu an theihna tawp hmanga ti lo tura nawr turin a lo ngen tawh bawk.
Gaza-a mihring cheng 2.5 million zinga a zahve vel lawih chu tunah Rafah-ah an awm mek a, Gaza chhuahsanin Rafah an lut a ni. Rafah khawpui dinhmun a chhe sa hle tawh a, tui, eitur leh damdawi te pawh tlakchham a ni nasa tawh a ni.
West Bank a Palestinian President Mahmoud Abbas pawhin Thawhtanni khan Rafah in run a tawk a nih chuan ‘Palestinian mite history a chhiatna nasa ber a thleng ang’ tiin a lo sawi tawh bawk.
Thawhtanni khan Israel chuan Hamas leh Israel tena inkahhai an siam thei a nih chuan Rafah beih tumna chu la dahthat rih a ni ang an lo ti tawh thung a.
Mahse chu mi hma lawkah pawh Israel Foreign Minister Israel Katz chuan israeli Channel 12 television hnenah ‘Inkahhai remtih a nih chuan Rafah operation kan dahtha rih ang’ tiin a sawi a.
Mahse, Thawhlehni khan Netanyahu chuan Israel-in Rafah-a a thiltum te a tihhlawhtlin hma loh chuan indona chu kalpui chhunzawm zel a ni ang a ti thung.
“Indonaa kan thil tumte kan tihhlawhtlin hmain indona tihtawp a ni ang tih chu zawhna a tling lo” tiin a sawi a.
“Rafah kan lut ang a, Hamas battalion te chu inremna kan siam emaw siam lo emaw kan nuaibo vek ang a, chu chu hnehna famkim chan nana pawimawh a ni” tiin Netanyahu chuan a sawi.
Mitang chhungte chuan prime minister leh national security adviser Tzachi Hanegbi te chu indona chhunzawm zel tur leh khawvel ram dangte nawrna uksak lo turin an ngen an ti bawk a. Mahse, mitang chhungte tam tak te chuan an chungte hruaikir an nih theih nan sorkar nawrin lungawilohna an lantir ve thung.
Nikum 7 October a Hamas tena Israel an beihthuta mitang 253 an hruai zingah 130 vel te chu an kutah an la awma ngaih a ni a, heng zinga 34 te chu an thi tawh anga ngaih niin a dang zawng te chu chhuah zalen an ni tawh thung.
Inkahhai a awm theih nan inbiakna neih chu a hlawhtling hleithei lo va. Thawhtanni khan US Secretary of State Antony Blinken chuan inkahhai a awm theih nana Israel-in rawtna a siam te chu thilphal tak tia sawiin Hamas tena an remtih ngei a beisei thu a sawi bawk.
Hetih lai hian UN refugee organisation hotu chuan Rafah run a ni dawn tih thawm chuan Rafah a cheng mipuite chu hrehawm takin a siam mek tiin a sawi a.
“Mipuite chu Rafah atanga insaseng tura hrilh an la ni lo va, mahse, tunkar chhunga inremna siam a nih loh chuan chu chu thil thleng thei a ni” tiin Philippe Lazzarini chuan a sawi.
Hetih lai vek hian International Criminal Court (ICC) The Hague chuan israeli official te chu indona kalpui danah pawi an khawih tia sawiin anmahni man theihna a tichhuak dawn tih thawm a awm bawk a.
Netanyahu chuan, “Thil pakhat chiang taka ka sawi duh chu The hague emaw khawi hmun dang mahin indonaa kan thiltum tihhlawhtlinna kawng min dang dawn lo” a ti hmak thung a.
“Israel chuan free world leader, democracy ram tin te chu State of Israel in mahni inven leh indan theihna a neiha hma a lakna tibahlah lo turin ka ngen a ni” tiin Netanyahu chuan a sawi.
Mahse, Netanyahu office chu June 2014 atang tawh khan Israel awp West bank, East Jerusalem leh Gaza Strip a an chet danah war crime a awm leh awmlohah an chhui chiang sa mek tawh a ni.
Israel chuan ICC founding treaty Rome Statute chu a pawm ve miah lo a ni bawk a, Netanyahu chuan ICC chuan an ram chhungah thuneihna engmah a nei lo a ti bawk a. Mahse, ICC chuan Palestinian chuan treaty an pawm avangin an jurisdiction chhunga awm a ni an ti ve thung.
White House Press Secretary Karine Jean-Pierre pawhin ICC court chuan jurisdiction a nei lo tia sawi bawkin investigation an neih chu a pawm loh thu a sawi bawk a. US pawh Rome Statute pawm ve lo a ni bawk.