Israel-in Hamas hruaitu lawk that leh

Israel-in Hamas hruaitu lawk that leh
Israeli thlawhnain an beihnaah Gaza Strip chhim lama Khan Younis khawpuiah an pawla political leader Salah al-Bardaweel-a an that niin Hamas hotuin Pathianni tuk khan a sawi.
Tual chhung mite chuan thlawhna atanga kahnaah hian Bardaweel-a bakah Hamas political office-a thawk pakhat a thi a, a nupui a thi bawk niin an sawi.
Israeli thuneitute erawh chuan Pathianni chawhma thleng khan engmah an la puang lo.
Israel hian sipai chakna hmanga Gaza an beih hi Thawhlehni khan an chhunzawm leh tan a. An indona thla hnih vel titawp lailawktu inkahhai, January 19 atanga an kalpui tan chu Hamas-in an pawh sei duh loh avanga thapui thawh lehah an inchhal.
Hamas erawh chuan Israeli puhna hi phain Israel zawkin Qatar, Egypt leh US palainaa inkahhai an puan chu an bawhchhe zawk niin an sawi ve thung.
Hamas enkawl health ministry hotu chuan Israel-in a beih thar lehna kal mek zelah Inrinni khan Gaza Strip hmun hrang hrangah Palestinian 32 an thi leh niin a puang.
Hamas-in thuchhuah an siamah chuan Bardaweel-a hi a nupui nen an tawngtai laiin an puan in chu Israeli missile-in a fuh niin an sawi tih Reuters news agency chuan a tar lang.
Tar lan tawh thin angin Israeli sipaite hian Hamas-in October 7, 2023-a an ram chhim lam beia mi 1,200 chuang an thah leh hren tura mi 251 an hruai chhan let nan a bei.
Sipai chakna hmanga an beih let hnuah hian Gaza-ah Palestinian 49,500 chuang an thi tawh niin Hamas enkawl health ministry chuan a sawi a. In leh thil dang ding tam zawk a chhe tawh bawk.