Israel-in mi hren ruang zawnnaah Hamas teltir

Israel-in mi hren ruang zawnnaah Hamas teltir
Israeli sorkar chuan Israel Defense Forces (IDF)-ten an thunun chin Gaza-ah Red Cross leh Egyptian miten mi hren thi tawh ruang 13 zawn hna an thawh mek pui turin Hamas mi pakhat luhtir an phalsak tih a sawi.
“Red Cross, Egyptian technical team leh Hamas pakhat chu IDF-in Gaza-a Yellow Line an siam chinah IDF enpuina hnuaia luh phalsak a ni,” tiin sorkar thupuangtu, Shosh Bedrosian-i’n a sawi.
Egyptian-te hian ‘tractor ang chi lirthei’ telin hmanraw dang an la lut dawn tih a sawi bawk.
Israel hian Hamas-te hi chawlhkar hnih awh tawh Gaza-a inkahhai chu ruang 28 hlan let tura tihah 15 chauh an la hlan avangin an bawhchhia niin an puh.
Palestinian pawh hian US, Egypt, Qatar leh Turkey ramten an buaipui inkahhai hi an la zawm a; mahse, kum hnih indona avanga in chim chhe kara ruang hmuh mai a harsa zawk niin an sawi.
October 10-a inkahhai puan a nih rual khan Israeli an hren la dam 20 chu chhuah nghal an ni a, Israel hian Palestinian lung in tang 250 leh Gaza-a an mi man 1,718 an chhuah ve bawk.
Israel hian Hamas-in ruang 13 an hlan tawh chhan let nan Palestinian ruang 195 an hlan tawh bawk.
Gaza-a mi hren ruang 13 la awm zinga 11 hi Israeli an ni a, Tanzanian leh Thai pakhat ve ve an la awm.
“Hamas hian khawiah nge an awm an hria a, min pek kir bak duhthlan tur an nei lo,” tiin Bedrosian-i chuan a sawi.
Hemi hma hian Israeli mi hren chhungkaw aiawh pawl chuan Hamas-in ruang an hlan mai loh avanga hma la turin Israel hi an lo nawr ve bawk a. Nawr nan hian US President Donald Trump-a’n Gaza muanna tura rawtna a neih kalpui zel tura inbiakna tihkhawtlai thlenga kalpui an duh.
Israeli chanchinbute chuan Trump-a sorkar hian ruang hmuh kim la ni lo mah se inremna tura ruahmanna awm sa thawh hnihna kalpui tan an duh leh tawh niin Israeli venhim hna thawktu hotu chuan a sawi tih an tar lang.
Gaza-a ruang la hmuh lote hi Hamas-in October 7, 2023-a Israel an beih tuma hren tura an hruai mi 251 zinga mi kha an ni a, hemi tuma an beihnaah hian mi 1,200 vel an that bawk.
Israel chuan he beihna hi sipai chakna hmanga chhang letin Gaza a rûn zui a, mi 68,500 chuang an thi niin Hamas hnuaia health ministry chuan a sawi.