Israel-in tanpuina luh nan hun pe
Gaza-ah humanitarian aid tam zawk a luh theih nan ni tin ‘military activity’ hun bituk siamin a chawlhsan ziah thin tawh tur thu a sawi.
Israel chuan ni tin local time 8:00 (05:00 GMT) atanga 19:00 thleng military activity a chawlhsan dawn tiin a sawi a.
Mahse hei hian Kerem Shalom crossing hmun pawimawh tak Gaza leh Israel tena an intawm lai chauh a huam dawn a ni.
Israel chu tun hnaiah Gaza a humanitarian crisis zual zel tur titawp tura nawrna a dawng nasa hle a, US pawhin a tur na hle.
Israel Defense Forces (IDF) te chuan thuchhuah an siamah UN leh international organizations te nena sawihona an neih hnuah thutlukna an siam thu an sawi bawk.
Humanitarian pause hi Kerem Shalong crossing, south Gaza atanga Salah al-Din Road main highway huam telin hmar lamah European Hospital, Khan Younis khawpui bul thleng a ni dawn a ni.
IDF te chuan thuchhuah an siamah southern Gaza Strip-ah erawh inkahhai a awm lo tia sawiin Rafah inbeihna chu chhunzawl zel a ni ang an ti bawk.
Thla khat chuang kaltaa Israel sipai ten Rafah an luhchilh hnuah mi sang tam takin an chhuahsan tawh a, Rafah crossing chu a hma chuan tanpuina pekluhna pawimawh ber ni thinin tunah erawh kharin a awm thng a ni.
Israel chuan Rafah a operation a neih chu tihmakmawh tiin Hamas te nuaichimih a tumna kawnga lohtheihloha kalpui ngai a ni tiin Rafah chu Hamas la dam te tawmkhawmnaa ti bawk.
International agencies te chuan Gaza a mihring dinhmun a chhiat lutuk tawh avangin inkahhai an ngiat nasa hle a. Chutihrual chuan tanpuina a tam thei ang ber chawkluh ni se an ti bawk.
World Health Organization Director-General Tedros Adhanom Ghebreyesus chuan Gaza-a mipui tam tak te chuan tam nasa tak an tawk mek tawh tiin a sawi a. Gaza a mamawh phur truck te luh phalsak chin chuan mipuite mamawh a phuhru zo lo an ti bawk.
UN’s humanitarian office, OCHA tia hriat lar chuan May thla khan ni tina Gaza-a truck humanitarian aid phurlut chu 97 a ni tiin April thla kha chuan 169 a ni a, March thlaah 139 a ni an ti bawk.
Nikum 7 October a indona a chhuah hma kha chuan Gaza-ah ni tin truck lut chu 500 vel a ni thung.
OCHA te chuan 7 May atang khan Kerem Shalom crossing paltlang private sector tanpuina te chu an chhinchhiah thei tawh lo tiin an sawi bawk.
Hetih lai hian IDF te chuan Rafah a bomb puak avangin Israeli sipai pariatin nunna an chan tia sawiin January thla atanga nikhata Israel in sipaia chan hnem ber tum a ni.
Rafah a Tal al-Sultan a Israel sipai ten operation an neih laiin Hamas armed wing te chuan rocket hmangin armoured vehicle kapin an lo lambunna lamah sipaite hian nunna an chan a ni.
Israeli prime Minister Benjamin Netanyahu chuan Hamas te laka indona chu an kalpui zui zel dawn tia sawiin he indonaa kan tum kan hlen hma chuan a man sang hle mahse kan kal zel dawn tho tiin a sawi bawk a.
“Hamas sorkar nuaichimih leh ralthuam lama an theihna tihchhiat vek, kan mitang an kawl te laklet, Gaza chu Israel tana hlauhawm tawh ngai lova siam heng te hi kan tihlawhtling dawn” tiin Netanyahu chuan a sawi.
Rafah khawpui chu Hamas militant battallion la awmte tawmkhawmna angah Israel chuan a ngai a, chuvangin Rafah khawpui chu luhchhuah ngei ngei chu tihmakmawhah a ngai bur a ni.