National Highways Infrastructure Development Corporation Limited (NHIDCL) leh Prokect Pushpak chuan a hrang ve ve in Mizoram larsap Gen (Dr) VK Singh (Retd) chu Raj Bhavan-ah hmuin Mizorama hma an lakna leh hmachhawp an sawipui.
Project Pushpak chief engineer Girish Prasad Singh chuan Mizorama Border Road Organisation (BRO) hnuaia hmalakna leh hmachhawp a hrilhfiah a. Tun thlengin Project Pushpak Mizoramin kawng km. 3150 a thui an siam zo tawh a, km. 2392 chu state leh central agency-te kutah an hlan tawh. Mizoram hmun hrang hranga kawngpui 14 an enkawl mek zinga 5 chu an zawhfel hnuah an enkawl zui a, 4 danga lei dawh mek tih loh chu zawhfel a nih bakah kawngpui siam mek 5 an nei a ni. Kumin chhungin lei 4 dawh zawhl hman an tum a ni.
Larsap chuan Mizoram ang tlangram chhengchhe takah technology thar ber berte chhawr tangkai chunga hun leh senso tlem zawka inkalpawhna tha zawk siam tum turin Project Pushpak a chah a. An project- a hun taka zawhfel a nih theihnan harstana awmte a ranglama chinfel dan ngaihtuah thin turin a chah bawk.
NHIDCL Regional office Aizawl executive director Virendra Kumar Jakhar leh a thawhpuiten an hmuhnaah larsap chuan, NHIDCL kaltlanga Mizorama kawngpui siam chu chak lakna pawimawh tak tak, nitin khawsak phung thlenga nghawng thei a ni tih sawiin, kawngpui tha leh tlo, hun tiam chhunga zo fel hman tuma tan la tur leh tunlai thiamna hmang tangkai turin a chah. A bikin state pawn atanga mamawh lakluhna kawng pawimawh Silchar pawhtu kawngpui chu ngaipawimawh zual turin a chah a ni.
NHIDCL executive director hian Mizorama hma an lak tawh dan powerpoint presentation hmangin a sawifiah a. Mizoramah national highway hna khawih km. 1523 a thui awm a, NHIDCL kutah km.921 a awm a, state PWD kutah km. 602 a awm. NHIDCL enkawl zinga km. 547 zawhfel tawh a ni a, km. 221 thawh mek niin, hmalak lehna tur km. 153 an nei a ni.
NHIDCL leh Project Pushpak-in Larsap hnenah hmalakna hrilh
Get real time updates directly on you device, subscribe now.
Prev Post