Joshua leh Whyte inhnek nawn leh dawn

Last updated Jul 7, 2023 14 0

Palian huanga boxer lar pahnih; Anthony Joshua leh Dillian Whyte te chu inhnek nawn leh turin an inrem thei ta a, an inhnek hun atan August 12, 2023 ruat a ni.
British boxer pahnih Joshua leh Whyte te hi kum riat kal ta, kum 2015 khan an lo inhnek tawh a, O2 Arena-a inhnek hmuhnawm takah Joshua hian Whyte a knockout a, round sarihnaah hnehna a chang. December 2015-a an inhnek hi professional huanga an inhnek vawi khatna a ni a. Hemi hma amatuer huangah kum 2009 khan an lo inhnek tawh a, hemi tum hian Whyte a chak ve thung. Vawi hnih an inhnek tawhah vawi khat ve ve an chak tawh a, August 12-ah an inkara chungnung zawk tur tihchian a ni ang.
Olympic champion hlui Anthony Joshua hian professional huangah inhnek vawi 28 inhnek a hmachhawn tawh a, vawi 25 chakin, tlawm zawkah vawi thum a tang tawh. Mexican boxer Andy Ruiz Jr lakah rin loh takin a vawi khat tlawmin Joshua hian a kawnghren hloh fai vek a. Andy Ruiz Jr hi hneh letin World champion a ni nawn leh. Hemi hnu hian Ukranian boxer Olek-sandr Usyk lakah tlawm in a kawnghren a hloh a, Usyk nen hian inhnek nawn leh mah se tlawm zawkah a tang nawn leh. Vawi hnih a tlawm zawn vanga hnual taka a awm hnuin February 2023 khan Jermaine Franklin a hneh a, kawng dikah a kir. August 12-a a hmachhawn tur Dillian Whyte a hneh a nih chuan champion hlui Deontay Wilder hma-chhawn turin hma an la zui leh ang.
Boxer hnek na zet mai Wilder nen hian December thlaah inhnek turin an indawr mek a, indawrna kal tluangin inremna an nei thei tep tawh niin promoter Eddie Hearn chuan a sawi a. An inhnekna hmun atan Saudi Arabia an tinzawn niin a sawi bawk.
Palian huanga boxer lak pawl tak ni chunga champion nih harsat Dillian Whyte hian inhnek vawi 32 hmachhawn tawhin vawi 29 a chak a, tlawm zawkah vawi thum a tang tawh. Kum 2022 khan WBC champion Tyson Fury nen kawnghren an inchuh a, tlawm zawkah a tan vangin kawnghren a hlawhchhuak zo lo nawn leh. Anthony Joshua a hneh thei a nih chuan title fight hmachhawn nawn beiseina sang zawk a nei nawn tura ngaih a ni.